ދެކުނު އޭޝިއާގެ ބޮޑީބިލްޑިންގެ މައި ޖަމުއިއްޔާ ކަމަށްވާ ސައުތު އޭޝިއަން ބޮޑީބިލްޑިން އެންޑް ފިޒީކް ސްޕޯޓްސް ފެޑެރޭޝަން (އެސްއޭޕީބީއެފް) ގެ ރައީސަކަށް ރާއްޖޭގެ ބޮޑީބިލްޑިން އެސޯސިއޭޝަން (ބީބީއޭއެމް) ގެ ރައީސް އިބްރާހީމް ހަމީދު (އިއްބެ) އިންތިޚާބުކުރައްވައިފިއެވެ.
އިއްބެ މި މަގާމަށް އިންތިޚާބުކުރައްވާފައިވަނީ ރާއްޖޭގައި މިހާރު ރާއްޖޭގައި ކުރިއަށްދާ 14 ވަނަ ސައުތު އޭޝިއަން ބޮޑީބިލްޑިން ޗެމްޕިއަންޝިޕްގެ ހަވާސާއިން ބޭރުން ބޭއްވި ދެކުނު އޭޝިއާ ބޮޑީބިލްޑިން ފެޑެރޭޝަންގެ އަހަރީ ބައްދަލުވުމުގެ ތެރެއިންނެވެ.
އަހަރީ އާންމު ބައްދަލުވުމުގައި ވޯލްޑް ބޮޑީބިލްޑިން އެންޑް ފިޒީކް ފެޑެރޭޝަން (ޑަބްލިއުބީޕީއެފް) އާއި އޭޝިއާ ބޮޑީބިޑިން ފެޑެރޭޝަން (އޭބީބީއެފް) ގެ ރައީސް ސިންގަޕޫރުގެ ދަތުކު ޕޯލް ޗުއާ ވެސް ބައިވެރިވެވަޑައިގެންނެވިއެވެ.
މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ހިންގާ ކޮމިޓީގެ މެންބަރުކަންވެސް ކުރައްވަމުން އަންނަ އިއްބެ ވަނީ 2022 ވަނަ އަހަރުގެ ފަހުކޮޅު ދުނިޔޭގެ ބޮޑީބިލްޑިން ފެޑެރޭޝަނުގެ ނައިބު ރައީސްގެ މަގާމަށް އިންތިޚާބުވެވަޑައިގެންފައެވެ. އަދި އޭޝިއާގެ ބޮޑީބިލްޑިން ފެޑެރޭޝަންގެ އެގްޒެކްޓިވް ވައިސް ޕްރެޒިޑެންޓްގެ މަގާމުވެސް އަދާކުރެއްވިއެވެ.
ދުނިޔޭގެ ފެންވަރުގެ ބޮޑީބިލްޑިން ޖަޖެއްގެ ގޮތުގައިވެސް ފާހަގަކޮށްލެވޭ އިއްބެ ވަނީ ވިއެޓްނާމްގެ ހަނޯއިގައި ބޭއްވި 31 ވަނަ ސައުތު އީސްޓް އޭޝިއަން ގޭމްސްގައި ޖަޖެއްގެ ގޮތުގައި ހަރަކާތްތެރިވެފައެވެ.
މި ޝަރަފާއެކު އިއްބެ ވެފައިވަނީ ދެކުނު އޭޝިއާގެ ކުޅިވަރު ފެޑެރޭޝަނެއްގެ ރައީސްކަން އަދާކުރައްވަމުން އަންނަ ރާއްޖޭގެ ކުޅިވަރު އެސޯސިއޭޝަނެއްގެ ދެވަނަ ރައީސަށެވެ. ރާއްޖޭގެ ބާސްކެޓްބޯޅަ އެސޯސިއޭޝަން (އެމްބީއޭ) ގެ ރައީސް އަޙްމަދު އާދަމް (އެޑަމް) އަންނަނީ ސައުތު އޭޝިއާގެ ބާސްކެޓްބޯޅަ ފެޑެރޭޝަން (ސާބާ) ރައީސްކަން ކުރައްވަމުންނެވެ.