ދިވެހިރާއްޖެއަކީ ސައްތައިން ސައްތަ އިސްލާމީ ޤައުމެކެވެ. ދިވެހިންގެ ތެރޭގައި އިސްލާމީ ޘަޤާފަތުގެ ސިފަތައް އެކުލެވިގެންވެއެވެ. އަދި އެފަދަ ކަންކަން މާޒީގައިވެސް އެކަށީގެންވާ މިންވަރަކަށް ފެނިފައިވެއެވެ.
ކުރީގެ ތާރީޚަށް ބަލާއިރު ދިވެހިން ރޯދަމަސް ފެށޭ ދުވަސް ނުވަތަ މުލަރޯދަދުވަސް ކަނޑައަޅަނީ ދިވެހިން އަމިއްލަށް ހަނދުބަލައި އެމައްޗަށް ޙާކިމާ ނިންމަވާ ނިންމެވުމަށް ރިޢާޔަތްކޮށްގެންނެވެ. ނުވަތަ ޝަޢުބާންމަހުގެ 30 ދުވަސް ހަމަކޮށްގެނެވެ. އަދި ފިޠުރު ޢީދު ދުވަސް ކަނޑައަޅައި ރޯދަމަސް ނިމުން ގެންނަނީވެސް ހަނދު ފެނުމުން، ނުވަތަ ރަމަޟާންމަހުގެ 30 ދުވަސް ހަމަކޮށްގެންނެވެ.
ދިވެހި ތާރީޚަށް ބަލާއިރު ރާއްޖޭގައި ހަނދުފެނުމުން ރާއްޖޭގެ ރައްޔިތުން ދިރިއުޅޭ ރަށްރަށާއި ދަތުރުވެރި ބައްތެލިފަހަރަށް އެ ޚަބަރު ކުރަނީވެސް ތަފާތު ގޮތަކަށެވެ. އެ ޒަމާނުގައި މުއާޞަލާތީ ޒަމާނީ ވަޞީލަތްތައް ނެތުމާއެކު ރޯދަމަސް ފަށަންވީކަން ނުވަތަ ފިޠުރު ޢީދު ފާހަގަކުރަންވީކަން އަންގަން، ރަށްރަށުގެ މެދުގައި މުޢާމަލާތު ކުރަނީ އަތިރިމަތީ ޖަހާ އަލިފާން ހުޅުގަނޑަކުންނެވެ. ނުވަތަ ރިޔަލު ނުވަތަ ފަލިޖަހާ ދޯނިފަހަރުގައި ދަތުރުކޮށްފައި ގޮސްގެންނެވެ. މިގޮތަށް އެންގުން ހުއްޓުމަކަށް އައީ ވޯކީޓޯކީ ސެޓާއި ރޭޑިއޯ ޓެލެފޯން ސެޓާއި އަދި ރާއްޖޭގައި ރޭޑިއޯ ބޭނުންކުރަން ފެށުމުންނެވެ. އަދި ފަހުން ޓީވީގެ ޚިދުމަތް ފެށުމަކީ މިކަން އިތުރަށް ފަސޭހަވިކަމަކަށެވެ.
ރާއްޖޭގައި ދީނީ ޢިލްމުގެ ކެރިފޯރުންތެރިކަން އިތުރުވުމުންނާއި ރަށްރަށުގައި ކޯޓްތައް ޤާއިމްކުރެވުމުން ހަނދު ސާބިތުކުރުން އިތުރަށް ހަރުދަނާކުރެވުނެވެ. ރާއްޖެއަށް ހަނދު ފެނިއްޖެނަމަ، ހަނދު ދުށް މީހަކު، ނުވަތަ ބަޔަކު އެރަށެއްގައި ހުންނަ ކޯޓަށް ޙާޟިރުވެ އެކަން ބަޔާންކޮށް އެކަން ސާބިތުކުރުމުގެ ފުރުޞަތު ހަމަޖެއްސެވިއެވެ. އަދި ރާއްޖެއަށް ހަނދު ފެނުނުކަން އެއްވެސް ފަރާތަކުން އަންގާފައި ނުވާނަމަ، އިސްލާމީ ޤައުމަކަށް ހަނދު ފެނުނުތޯއާއި އަދި ފަލަކީ ހިސާބުތަކަށް ބަލާއިރު، ރާއްޖެއަށް ހަނދުފެނުމުގެ ފުރުޞަތު އޮތްމިންވަރަށް ރިޢާޔަތްކުރައްވައި ގޮތެއް ނިންމަވަން ފެއްޓެވިއެވެ. މިކަމުގައި ގޮތެއް ނިންމަވަނީ، ސަރުކާރުގެ ކަމާބެހޭ ރަސްމީ ފަރާތްތަކާއި، ދީނީ، އަދި ފަލަކީ ޢިލްމުވެރިންގެ މައްޗަށް އެކުލަވާލެވިފައި އޮންނަ ކޮމެޓީއަކުންނެވެ. މިހާރުވެސް މިކަން ކުރައްވަމުން ގެންދަވަނީ މި އުޞޫލުންނެވެ.
ފަހުގެ ތާރީޚަށް ބަލާއިރު ދިވެހި ރައްޔިތުން ރަމަޟާން މަހަށްވެސް އަދި ޝައްވާލް މަހަށްވެސް ހަނދުބަލަން ނިކުމެ ހަނދުފެނޭތޯ މަސައްކަތްކުރަމުން ގެންދިއުމަކީ އެހާ ޢާންމު ކަމެއް ނޫނެވެ. އެހެންނަމަވެސް މިއަންނަ ރަމަޟާންމަހަށް ހަނދުބެލުމުގެ ކަންކަމުގައި ޢާންމުންނާއި އެކި ފަރާތްތަކުން ބައިވެރިކުރުން އިތުރުކުރެއްވުމަށް ސަރުކާރުން ވަނީ ކަނޑައަޅުއްވާފައެވެ.
img:http://s1.psmnews.mv/images/660x400/14629595722903.jpg|
އިސްލާމިކް މިނިސްޓްރީން ހާމަކުރެއްވި ގޮތުގައި ހަނދުބެލުން، އެންމެން ޝާމިލްވާ ގޮތަށް، ޤައުމީ ޙަރަކާތެއްގެ ގޮތުގައި ކުރިއަށްގެންދެވުމަށް ވަނީ ނިންމަވާފައެވެ. އަދި މި އަހަރަކީ، ރާއްޖެއަށް ހަނދު ފެނުމުގެ ފުރުޞަތު ބޮޑު އަހަރެއްކަމަށް ފަލަކީ ހިސާބުތަކުން ދައްކާކަމަށްވެސް އެ މިނިސްޓްރީން ވިދާޅުވެއެވެ. ހަނދުބެލުމަށް މިއަހަރު ކުރިއަށްގެންދަވާ ކަންތައްތަކާ ގުޅޭގޮތުން، އިސްލާމިކް މިނިސްޓަރގެ ނާއިބު، މުޙައްމަދު މުސްތަފާ ވިދާޅުވީ، ހަނދުބެލުން ކުރިއަށްދާނީ އެންމެންގެ ބައިވެރިވުން ހިމެނޭގޮތުން ކަމަށެވެ.
" ކައުންސިލްތަކާއި ގުޅިގެން ރާއްޖޭގެ ހުރިހާ ރަށެއް ހިމެނޭހެން އެންމެން މިއަހަރު ހަނދުބަލަން ނިކުންނާނެ. އަޅުގަނޑުމެން މިކަމަށް ޚާއްސަ ހޭޝްޓެގެއް ހެދިގެން ފޮޓޯވެސް ޝެއަރ ކުރާގޮތަށް އިވެންޓް އިންތިޒާމް ކުރެވިފައިވަނީ. އަދި އެދުވަހުގެ ހަވީރު ފަސްގަޑި ތިރީހުން ފެށިގެން މީޑިޔާތަކުން މި ހަރަކާތް ލައިވް އިވެންޓެއްގެ ގޮތުގައި ގެނެސްދެވޭނެ. އެގޮތުުން މީޑިޔާ ތަކާއި ވާހަކަދެއްކުމަށް މިދަނީ ތައްޔާރުވަމުން " މުަސްތަފާ ވިދާޅުވިއެވެ.
ރާއްޖޭގެ ކަނޑުގެ ސަރަޙައްދުންވެސް ހަނދުބެލުން ކުރިއަށް ގެންދަވާނެކަމަށް އިސްލާމިކް މިނިސްޓްރީން ވިދާޅުވެއެވެ.
" ކަނޑުގެ ސަރަޙައްދުންވެސް ހަނދު ބެލުން ކުރިއަށްދާނެ. އެކަން ދާނީ ކޯސްޓްގާޑްގެ އެހީތެރިކަމާއެކު. މިއީ ވިހާވެސް ބޮޑަށް ޢަމަލީގޮތުން ބައިވެރިވުން އިތުރުކުރުމަށް ކުރެވޭ ކަމެއް. ރާއްޖޭގައި ކަނޑުގެ ސަރަޙައްދު ބޮޑުވުމުން، ކަނޑުގެ ސަރަޙައްދުންވެސް ހަނދު ފެނުން އެކަށީގެންވޭ. " މުސްތަފާ ފާހަގަކުރެއްވިއެވެ.
ހަނދުބެލުމަށް ކުރިއަށްގެންދެވޭ ހަރަކާތްތަކާއެކު، މިއަހަރުގެ ރަމަޟާންމަހުގެ ފެށުން ވަރަށް ޚާއްސަވެގެންދާނެ ކަމަށް އިސްލާމިކް މިނިސްޓްރީން ވިދާޅުވެއެވެ.
ހަނދު ބެލުން މިފަދަ ގޮތަކަށް ކުރިއަށް ގެންދިއުމަކީ، ދީނީ ރޫޙް އާލާވެ، ރައްޔިތުންގެ އެއްބައިވަންތަކަން އިތުރުވެގެންދާނެ ކަމެއް ކަމަށް ސަރުކާރުން ގަބޫލުކުރައްވައެވެ. ހަނދު ބެލުމުގެ އިތުރުން، މިއަހަރުގެ ރަމަޟާން މަހަކީ، އެހެން އަހަރުތަކާ ޚިލާފަށް، ދީނީ ކަންކަމުގައި މަސްޢޫލުވާ މިންވަރު އިތުރު މައްސަރަކަށް ހެއްދެވުމުގެ މަޤްޞަދުގައި އިސްލާމިކް މިނިސްޓްރީން ވަނީ ގިނަ ޙަރަކާތްތަކެއް ރާއްވަވާފައެވެ.