ރާއްޖޭގެ ރިސޯޓުތަކުގެ މެދުގައި ކުރިއަށްދާ އެންމެ ބޮޑު ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ދާލު ޒޯނުގެ ކުޅުން އަންނަ ހޮނިހިރު ދުވަހު ފެށުމަށް ތައްޔާރުވެއްޖެއެވެ.
ދާލު ޒޯނުގެ މެޗުތައް މި އަހަރުވެސް ކުޅުމަށް ހަމަޖެހިފައިވަނީ ކަނޑިންމަ މޯލްޑިވްސްގައެވެ. މި ޒޯނުގައި ޖުމްލަ ފަސް ރިސޯޓެއް މި އަހަރު ވާދަކުރުމަށް ވަނީ ހަމަޖެހިފައެވެ.
ވާދަކުރުމަށް ހަމަޖެހިފައިވާ ރިސޯޓުތަކަކީ މުބާރާތް ބާއްވާ ކަނޑިންމަ ރިސޯޓުގެ އިތުރުން ނިޔާމަ ޕްރައިވެޓް އައިލެންޑާއި، އިރު ވެލި ރިސޯޓް އަދި ސެއިންޓް ރީޖަސް އާއި ވެލާވަރެވެ. މި ޒޯނުގެ ފުރަތަމަ މެޗުގައި އަންނަ ހޮނިހިރު ދުވަހުގެ ހަވީރު ބައްދަލުކުރާނީ ކަނޑިންމަ އާއި ސެއިންޓް ރީޖަސްއެވެ. އެ ދުވަހު ކުޅޭ ދެވަނަ މެޗުގައި ބައްދަލުކުރާނީ ނިޔާމަ އާއި އިރު ވެލި ރިސޯޓެވެ.
މުބާރާތް ކުރިއަށްދާނީ ލީގު އުސޫލުން ކޮންމެ ޓީމެއް ކޮންމެ ޓީމަކާ ބައްދަލުކޮށް އެންމެ ގިނަ ޕޮިއންޓް ހޯދާ ޓީމެއް ސީދާ ފައިނަލަށް ދާ ގޮތަށެވެ. އަދި ފައިނަލުގައި ބައްދަލުކުރާ ދެވަނަ ޓީމަކަށް ވާނީ ލީގު ބުރު ނިމޭއިރު ދެވަނަ އާއި ތިންވަނަ ހޯދާ ޓީމުތަކުގެ މެދުގައި ކުޅޭ ސެމީ ފައިނަލު މެޗުން މޮޅުވާ ޓީމެކެވެ. ދާލު ޒޯނުގެ ފައިނަލް މެޗު ކުޅުމަށް ތާވަލުކޮށްފައިވަނީ މި މަހުގެ 15 ވަނަ ދުވަހެވެ.
މި އަހަރުގެ ރިސޯޓް ލީގުގައި އެންމެ ފުރަތަމަ ކުރިއަށްދިޔައީ ނޯތު މާލޭ ޒޯނުގެ ކުޅުމެވެ. ނޯތު މާލޭ ޒޯނުގެ ޗެމްޕިއަންކަން ހޯދާފައިވަނީ ބަނޑޮސް މޯލްޑިވްސްއެވެ. މިއީ ބަނޑޮހުން އެ ޒޯނުގެ ޗެމްޕިއަންކަން ހޯދި ފަސްވަނަ ފަހަރެވެ.
އެންމެ ފަހުން މިދިޔަ އަހަރު ބޭއްވި ދާލު ޒޯނުގެ ޗެމްޕިއަންކަން ހޯދާފައިވަނީ ނިޔާމަ ޕްރައިވެޓް އައިލެންޑެވެ. އެ ޓީމު ޗެމްޕިއަންކަން ހޯދީ ފައިނަލުގައި ކަނޑިންމަ އާއި ވާދަކޮށް ޕެނަލްޓީގައި ކުރިހޯދައިގެންނެވެ.