ބައިނަލްއަގުވާމީ ފުޓްބޯޅައިގައި ޔޫރަޕް ބައްރުން އެންމެ ފާހަގަކޮށްލެވޭ އެއް ޓީމު ކަމަށްވާ ފްރާންސަކީ މި ފަހަރުގެ ޔޫރޯގެ ވެސް ފޭވަރިޓެކެވެ. 1988 ވަނަ އަހަރުގެ ފަހުން މިހާތަނަށް ކުޅުނު ކޮންމެ ޔޫރޯއެއްގައި ވާދަކޮށްފައިވާ ފްރާންސް މި ފަހަރު ހިމެނުނު ގްރޫޕް ޑީގައި ދެން އޮތީ ޕޮލަންޑާއި، ނެދަލަންޑްސް އަދި އޮސްޓްރިއާއެވެ.
މިދިޔަ ޔޫރޯގައި ބޮޑު ނާކާމިޔާބީއަކާ ކުރިމަތިލާންޖެހުނު ނަމަވެސް، އެންމެ ފަހުން ކުޅުނު ދެ ވޯލްޑް ކަޕްގެ ފައިނަލްގައި ވަނީ ކުޅެފައެވެ. މީގެތެރެއިން 2018 ވަނަ އަހަރުގެ މުބާރާތުގެ ތަށި ހޯދާފައިވާއިރު، އެންމެ ފަހުގެ ވޯލްޑް ކަޕުގެ ފައިނަލްގައި އާޖެންޓީނާ އަތުން ވަނީ ބަލިވެފައެވެ. ޔޫރޯގެ ތައްޓެއްގައި އެ ޓީމަށް އެންމެ ފަހުން އަތްލެވުނީ މީގެ 24 އަހަރު ކުރީންނެވެ. އެ ޓީމުން ވަނީ ދެ ފަހަރެއްގެ މަތީން މި މުބާރާތް ކާމިޔާބުކޮށްފައެވެ. އެއީ 1984 އާއި 2000 ވަނަ އަހަރެވެ. އޭގެފަހުން އަމިއްލަ ގައުމުގައި ކުޅުނު 2016 ވަނަ އަހަރުގެ ޔޫރޯގެ ފައިނަލްގައި ޕޯޗުގަލް އަތުން ވަނީ ބަލިވެފައެވެ.
ހުނަރުގެ ގޮތުން ދުނިޔޭގެ ފެންވަރުގެ ގިނަ ކުޅުންތެރިންތަކެއް ތިބި މި ޓީމުން ޔޫރޯއަށް ކޮލިފައިވީ ވަރުގަދަ ގްރޫޕެއްގެ އެއްވަނަ ހޯދައިގެންނެވެ. ކޮލިފައިންގައި މި ޓީމުން ވަނީ ނެދަލެންޑްސްގެ އިތުރުން ގްރީސް އާއި ރިޕަބްލިކް އޮފް އަޔަލަންޑް ފަދަ ޓީމުތަކުގެ މައްޗަށް ކުރިހޯދާފައެވެ.
މުބާރާތަށް ކޮލިފައިވުމަށް ކުޅެވުނު މެޗުތަކޭ އެއްގޮތަށް މި ފަހަރުގެ ޔޫރޯގައިވެސް ފްރާންސަށް ބާރުބޮޑުކުރާނެ ޓީމަކަށް ވެގެންދާނީ ނެދަލަންޑްސްއެވެ. ކޮލިފައިންގައި ފްރާންސްގެ މައްޗަށް ކުރިނުހޯދި، ދެވަނަ ޓީމުގެ ގޮތުގައި މި މުބާރާތުން ޖާގަ ހޯދި ނެދަލަންޑްސްއިން ވަނީ 1988 ވަނަ އަހަރުގެ ޔޫރޯ ކާމިޔާބުކޮށްފައެވެ. އެންމެ ފަހުގެ ޔޫރޯގެ ދެވަނަ ބުރުގައި ނެދަލަންޑްސްއަށް ނާކާމިޔާބުވިއިރު، 2022 ވަނަ އަހަރުގެ ވޯލްޑް ކަޕުން ކެޓީ ކުއާޓާ ފައިނަލާ ހިސާބުންނެވެ.
މި ގްރޫޕުގައި ހިމެނޭ ޕޮލަންޑުން މިހާތަނަށް ޔޫރޯގެ ހަތަރު މުބާރާތުގައި ވާދަކޮށްފައިވާއިރު، އެންމެ ދުރަށް ދެވިފައިވަނީ ކުއާޓާ ފައިނަލަށެވެ. އެއީ ފްރާންސްގައި ބޭއްވި 2016 ވަނަ އަހަރުގެ މުބާރާތުންނެވެ. އެންމެ ފަހުގެ މުބާރާތުގައި އެ ޓީމު ކެޓީ ގްރޫޕް ސްޓޭޖުންނެވެ. 2022 ވަނަ އަހަރުގެ ވޯލްޑް ކަޕްގެ ދެވަނަ ބުރުން އެ ޓީމު އަލްވަދާއު ކިޔަންޖެހުނީ ފްރާންސް އަތުން ބަލިވުމުންނެވެ. މި ފަހަރުގެ މުބާރާތަށް އެ ޓީމު ކޮލިފައިވީ އެސްޓޯނިއާ އާއި ވޭލްސް އަތުން ޕްލޭއޮފްގައި މޮޅުވެގެންނެވެ. އެއީ ކޮލިފައިންގައި އަލްބޭނިއާ އާއި ޗެކް ރިޕަބްލިކާއެކު ހިމެނުނު ގްރޫޕުގެ ތިންވަނަ މަގާމު ލިބުމުންނެވެ.
ގްރޫޕް ޑީގައި ދެން ހިމެނޭ އޮސްޓްރިއާއިން މި އަހަރުގެ ޔޫރޯއަށް ކޮލިފައިވީ ބެލްޖިއަމާއެކު ހިމެނުނު ގްރޫޕުގެ ދެވަނަ މަގާމު ހޯދައިގެންނެވެ. މި ފަހަރުގެ ޔޫރޯއަކީ އެ ޓީމުގެ ހަތަރުވަނަ މުބާރާތެވެ. މި މުބާރާތުން ލިބިފައިވާ އެންމެ ބޮޑު ކާމިޔާބީ އަކީ އެންމެ ފަހުގެ މުބާރާތުގެ ދެވަނަ ބުރުގައި ވާދަކޮށްފައިވުމެވެ.
މި ގްރޫޕުގެ ފުރަތަމަ މެޗުގައި ޕޮލަންޑުން ނެދަލަންޑްސްއާ ބައްދަލުކުރާއިރު، ދެވަނަ މެޗުގައި ފްރާންސް ނިކުންނާނީ އޮސްޓްރިއާއާ ދެކޮޅަށެވެ.