ރާއްޖޭގެ ފެތުމަށް އަންނަ ބަދަލާއެކު ސްވިމިން އެސޯސިއޭޝަން އޮފް މޯލްޑިވްސްގެ ނަން މެންބަރުންގެ ލަފަޔާއެކު މޯލްޑިވްސް އެކުއެޓިކްސްގެ ނަމަށް ބަދަލުކުރަންޖެހޭ ކަމަށް ސްވިމިން އެސޯސިއޭޝަންގެ ރައީސް މުޙައްމަދު އަބްދުލް ސައްތާރު (ޗަމްޕީ) ވިދާޅުވެއްޖެއެވެ.
ސްވިމިންގެ ބައިނަލްއަގުވާމީ ޖަމުއިއްޔާގެ ނަން، އިންޓަރނޭޝަނަލް އެކުއަޓިކްސްއަށް ބަދަލުކޮށްފައިވާއިރު، ސައްތާރު ވިދާޅުވީ އެ ގޮތަށް ގިނަ ގައުމުތަކުންވެސް އެކުއަޓިކްސް ހިމެނޭ ގޮތަށް ނަން ބަދަލުކުރަމުން އަންނަ ކަމަށެވެ. އަދި ބައިނަލްއަގުވާމީ ބައެއް ބައްދަލުވުންތަކަށްދާއިރު، ރާއްޖޭގެ ސްވިމިން އެސޯސިއޭޝަނަށް، މޯލްޑިވްސް އެކުއަޓިކްސްގެ ނަމުންވެސް މުޚާތިބުކުރާކަން ސައްތާރު ފާހަގަކުރެއްވިއެވެ.
"އަޅުގަނޑުމެންގެވެސް ސްވިމިން އެސޯސިއޭޝަންގެ ނަން މެންބަރުންގެ ލަފަޔާއެކު ބަދަލުކުރަން އެބަޖެހޭ. ބަދަލާއެކު ކިޔާނީ މޯލްޑިވްސް އެކުއަޓިކްސް. ބޭރުގައި ޖަލްސާތަކުގައި ވެސް ޖަހާފައި ހުންނަނީ މޯލްޑިވްސް އެކުއަޓިކްސް، އެއީ އެ ބަދަލު ގެންނަންޖެހޭ ކަމަށް ބޭރުގެ ޖަމިއްޔާތަކަށް ވެސް ފެންނާތީ.މުޙައްމަދު އަބްދުލް ސައްތާރު (ޗަމްޕީ) - ސްވިމިން އެސޯސިއޭޝަންގެ ރަޢީސް
މީގެ އިތުރުން އިންޓަރނޭޝަނަލް އެކުއަޓިކްސްއިން އެދޭ ބައެއް ކަހަލަ ބަދަލުތައް، ސްވިމިން އެސޯސިއޭޝަންގެ ގަވާއިދަށްވެސް ގެންނަން ޖެހޭ ކަމަށާއި، އައު ހިންގާ ކޮމިޓީގެ ދައުރު ފެށުމާއެކު، މެންބަރުންނާއެކު ދުރާލާ އެ މަސައްކަތްވެސް ފެށިގެންދާނެ ކަމަށް ސައްތާރު ވިދާޅުވިއެވެ. އަދި މީގެ އެންމެ މުހިއްމު ކަމަކީ ވަގުތު އޮއްވައި، މި ކަންކަމުގެ މައުލޫމާތު މެންބަރުންނަށް ފޯރުކޮށްދީގެން، މަސައްކަތް ފުރިހަމަކުރުން ކަމަށްވެސް ސައްތާރު ވިދާޅުވިއެވެ.