ޔޫރަޕްގެ ޗެމްޕިއަންކަން ދާދި ފަހުން ހޯދި ސްޕެއިންގެ ރެއާލް މެޑްރިޑަށް ފްރާންސްގެ ތަރި ކީިލިއަން އެމްބާޕޭ ސޮއިކޮށްފިއެވެ.
އުމުރުން 25 އަހަރުގެ އެމްބާޕޭއަކީ ވޭތުވެދިޔަ ހައެއްކަ އަހަރު ރެއާލުން އެކި ފަހަރު މަތިން ފާރަލި ކުޅުންތެރިއެކެވެ. އެގޮތުން އެމްބާޕޭ ހޯދަން މީގެ ކުރިން ތިން ފަހަރެއްގެ މަތިން ރެއާލުން ވަނީ ބިޑްކޮށްފައެވެ. އެގޮތުން ރެއާލުން އަގުބޮޑު ޓްރާންސްފާ ފީއެއް ހުށަހެޅި ނަމަވެސް, ޕީއެސްޖީން ވަނީ އޭނާ ވިއްކާލަން ދެކޮޅު ހަދާފައެވެ.
އެކަަމަކު މި ސީޒަނަށް ފަހު އެމްބާޕޭ ޕީއެސްޖީއާއެކު ހަދާފައިވާ އެއްބަސްވުމުގެ މުއްދަތު ހަމަވެ، ހިލޭ ޓްރާންސްފާއެއްގައި އޭނާ ވަނީ ރެއާލަށް ސޮއިކޮށްފައެވެ. ރެއާލާއެކު އެމްބާޕޭ ސޮއިކޮށްފައިވަނީ ފަސް އަހަރުގެ އެއްބަސްވުމެއްގައެވެ. އެމްބާޕޭ ރެއާލަށް ސޮއިކުރިކަން އެ ކުލަބުން ރަސްމީކޮށް އިއުލާނުކުރި ނަމަވެސް، ރެއާލުގެ ކުޅުންތެރިއެއްގެ ގޮތުގައި އެމްބާޕޭ ތައާރަފުކުރަން ބާއްވާ ހަފުލާ، މި މަހުގެ 14 ވަނަ ދުވަހު ފަށާ ޔޫރޯ ފުޓްބޯޅަ މުބާރާތަށްފަހު ބޭއްވުމަށް ރެއާލުން ވަނީ ނިންމާފައެވެ.
ޔޫރޯގެ ކުއާޓާ ފައިނަލަށްވުރެ ދުރަށް ފްރާންސް ދަތުރުކޮށްފިނަމަ، ރެއާލްގެ ޕްރީ-ސީޒަން ޓުއާގައި އެމްބާޕޭ ބައިވެރިއެއް ނުވާނެއެވެ. އަދި ސްޕެނިޝް ފުރަތަމަ ހަފުތާގެ މެޗުތަކުގައިވެސް އެމްބާޕޭ ނުކުޅޭނެއެވެ. އެ ކުލަބާއެކު އޭނާ ފުރަތަމަ މެޗު ކުޅޭނީ އޮގަސްޓް މަހުގެ 14 ގައި އިޓަލީގެ އެޓަލާންޓާއާ ދެކޮޅަށް ކުޅޭ ޔުއެފާ ސުޕަރ ކަޕުގެ މެޗެވެ.
ރެއާލުން އެމްބޭޕޭއަށް މުސާރައިގެ ގޮތުގައި އަހަރަކު 15 މިލިޔަން ޔޫރޯ ދިނުމަށް ވަނީ ހަމަޖެހިފައެވެ. މި އާއެކު އެމްބާޕޭ ވެގެންދާނީ ރެއާލުގައި އެންމެ ބޮޑު މުސާރައެއް ލިބޭ ކުޅުންތެރިޔާއަށެވެ. އަދި އެއްބަސްވުމުގައި ސޮއިކުރުމާއެކު އެމްބާޕޭއަށް ބޯނަހެއްގެ ގޮތުގައި 150 މިލިޔަން ޕައުންޑް ދިނުމަށް ހަމަޖެހިފައިވާ ކަމަށްވެސް ރިޕޯޓުތައް ބުނެއެވެ.
ޕީއެސްޖީ ދޫކޮށް އެމްބާޕޭ ރެއާލަށް ބަދަލުވިއިރު، އޭނާ ވަނީ ޕީއެސްޖީއަށް ކުޅެދިން 306 މެޗުގައި 256 ލަނޑު ޖަހައި 96 އެސިސްޓް ހަދާފައެވެ. އަދި ޕީއެސްޖީއާއެކު ހަތް ފަހަރު ފްރެންޗް ލީގު ވަނީ ކާމިޔާބުކޮށްފައެވެ.