ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ނޯތު މާލޭ ޒޯނުގެ ޗެމްޕިއަންކަން ފަސްވަނަ ފަހަރަށް ބަނޑޮސް މޯލްޑިިވްސްއިން ހޯދައިފިއެވެ.
ނޯތު މާލޭ ޒޯނުގެ ކުޅުން ވަން އެންޑް އޮންލީ ރީތި ރަށުގައި ކުރިއަށްދިޔައިރު، މި ޒޯނުގެ ޗެމްޕިއަންކަން ބަނޑޮހުން ހޯދީ މިއަދު ހަވީރު ކުޅުނު ފައިނަލް މެޗުގައި ފަހަތުން އަރައި 3-1 ގެ ނަތީޖާއަކުން ބަރޮސް މޯލްޑިވްސް ބަލިކުރުމަށްފަހުއެވެ.
މި މެޗުގައި ފުރަތަމަ ލަނޑު ޖަހައި ލީޑު ނެގީ ބަރޮހުންނެވެ. ފުރަތަމަ ހާފުގެ ފަހު މިނެޓުގައި ލިބުނު ޕެނަލްޓީއަކުން މި ލަނޑު ކާމިޔާބުކޮށްދިނީ ހުސައިން ވިފާގެވެ. އެކަމަކު ދެވަނަ ހާފުގައި ބަނޑޮހުން ވަނީ ކުޅުން ރަނގަޅުކޮށް އެ ޓީމު ކޮޅަށް ނަތީޖާ އަނބުރާލާފައެވެ.
އެގޮތުން މެޗުގެ 34 ވަނަ މިނެޓުގައި އަޙްމަދު ޝަމީމް ވަނީ ލަނޑެއް ޖަހައި، ބަނޑޮހަށް ނަތީޖާ އެއްވަރުކޮށްދީފައެވެ. އަދި އޭގެ މިނެޓެއް ފަހުން ބަނޑޮހުން ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީ އަޙްމަދު ރަޝީދެވެ. މި މެޗުގައި ބަނޑޮހުން ލީޑު ފުޅާކޮށްފައިވަނީ މެޗުގެ ފަހު މިނެޓުގައެވެ. މި ލަނޑު ޖަހައިދިނީ މެޗުގެ މޮޅު ކުޅުންތެރިޔާގެ މަގާމު ހޯދި އިބްރާހީމް މުޝީރެވެ.
ރިސޯޓް ލީގުގެ ނޯތު މާލޭ ޒޯނުގެ އެންމެ މޮޅު ކުޅުންތެރިޔާގެ މަގާމަށް ހޮވިފައިވަނީވެސް ބަނޑޮހުގެ މުޝީރެވެ. މި ޒޯނުގެ ގަދަ ފަސް ކުޅުންތެރިން ތެރޭގައި ހިމެނެނީ ބަނޑޮހުގެ ޝަަމީމް އާއި، މުޙައްމަދު އިކްރާމް އާއި، ޢަބްދުﷲ ރަފާހުގެ އިތުރުން ބަރޮހުގެ ވިފާގު އާއި އަލީ ޒަޔާނެވެ. މީގެ އިތުރުން އެންމެ ގިނަ ލަނޑު ޖެހި ކުޅުންތެރިޔަކީ ހުވަފެން ފުށީގެ އަޙްމަދު އައިމަންއެވެ. އަދި ނީތު މާލޭ ޒޯނުގެ އެންމެ މޮޅު ކޯޗަކީ ބަނޑޮހުގެ ކޯޗު އަޙްމަދު އަހުސަން (ބަރޯ) އެވެ.
ރިސޯޓް ލީގުގައި ދެން އޮންނާނީ ދާލު ޒޯނުގެ ކުޅުމެވެ. އެގޮތުން ކަނޑިންމަ ރިސޯޓުގައި ދާލު ޒޯނުގެ ކުޅުން ކުރިއަށްދާއިރު، އެ ޒޯނުގެ މެޗުތައް ފެށުމަށް ހަމަޖެހިފައިވަނީ މި މަހުގެ އަށްވަނަ ދުވަހެވެ.