ހަންގޭރީގެ ޔުނިވަރސިޓީ އޮފް ސްޕޯޓްސް ސައިންސް، އިންޓަރނޭޝަނަލް ކޯޗިން ކޯހުން ގުރައިޝް އަފްރާހު ކާމިޔާބުކަމާއެކު ދަސްވެނިވެއްޖެއެވެ.
ސްޕޯޓްސް ކޯޗިންގެ ދާއިރާއިން އެޑްވާންސް ތަމްރީނާއި ތައުލީމު ފޯރުކޮށްދިން މި ކޯސް ކުރިއަށްދިޔައީ އޭޕްރީލް މަހުގެ އެއްވަނަ ދުވަހުން ފެށިގެން މެއި މަހުގެ 31 ވަނަ ދުވަހުގެ ނިޔަލަށެވެ.
މި ކޯހުގައި ކިޔަވައިދިން ބައިތަކުގެ ތެރޭގައި ޒަމާނީ ކުޅިވަރު ކޯޗިންއަށް ބޭނުންވާ ގިނަ ބައިތަކެއް ހިމަނާފައިވެއެވެ. ތިއޮރިޓިކަލް ނޮލެޖް، ޕްރެކްޓިކަލް ކޯޗިން ޓެކްނިކްސް، ސްޕޯޓްސް ސައިކޮލޮޖީ އަދި ޕާފޯމަންސް އެނަލިސިސް ހިމެނެއެވެ.
މި ކޯހުން ގުރައިޝް އަފްރާހަށް ލިބިފައިވާ އިލްމާއި ހުނަރުގެ ސަބަބުން ޝައްކެއްވެސް ނެތް ގޮތުގައި ގައުމީ އަދި ބައިނަލްއަގުވާމީ މައިދާނުގައި ދިވެހި އެތުލީޓުންގެ ކުރިއެރުމާއި ކާމިޔާބީއަށް މަގުފަހިވެގެންދާނެ ކަމަށް މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ގަބޫލުކުރެއެވެ. އަދި މި ކޯހުން ދަސްވެނިވުމާއެކު އެމްއޯސީން ވަނީ ގުރައިޝްއަށް މަރުހަބާ ކިޔާފައެވެ.
އެމްއޯސީން ބުނީ މި ކާމިޔާބީއަށް ގުރައިޝް އަފްރާހަށް މަރުހަބާ ކިޔާ ކަމަށާއި، އޭނާގެ ކޯޗިންގެ ހުނަރު އިތުރުވުމުގެ ސަބަބުން އެތުލީޓުންނާއި ކުޅިވަރު މުޖުތަމައުއަށް ހެޔޮ އަސަރެއް ކުރާނެ ކަމަށް އުއްމީދުކުރާ ކަމަށެވެ.
ބާސްކެޓްބޯޅައިގައި ފާހަގަކޮށްލެވޭ ގުރައިޝްއަކީ ކޯޗިންގެ ދާއިރާގައި މިހާރުވެސް ހަރަކާތްތެރިވަމުން އަންނަ ކޯޗެކެވެ. ނަތީޖާ ނެރެދިނުމުގައި ފާހަގަކޮށްލެވޭ ގުރައިޝް ވަނީ މިހާތަނަށް ގައުމީ ފެންވަރާއި، ލޯކަލް މުބާރާތްތަކުގެ އިތުރުން ސްކޫލް މުބާރާތްތަކާއި، އެކެޑަމީ މުބާރާތްތަކުގައި ކޯޗިން ޓީމުގައި ފާހަގަކޮށްލެވޭ ގިނަ މަސައްކަތްތަކެއް ކޮށްފައެވެ.