ސްވިމިން އެސޯސިއޭޝަން އޮފް މޯލްޑިވްސްގެ ރައީސްގެ މަގާމަށް ހަތަރުވަނަ ދައުރަކަށް މުޙައްމަދު އަބްދުލް ސައްތާރު (ޗަމްޕީ) އިންތިޚާބުވެވަޑައިގެންފިއެވެ.
އިންތިޚާބުގައި ކޮންމެ މަގާމަކަށްވެސް ކުރިމަތިލެއްވީ އެންމެ ބޭފުޅެއް ކަމުން, ނެގީ ފެންނަ ނުފެންނަ ވޯޓެކެވެ. އެސޯސިއޭޝަނުގެ ހަތަރުވަނަ ދައުރަކަށް ސައްތާރު އިންތިޚާބުވެވަޑައިގެންނެވީ މިއަދުގެ ވޯޓުގައި ބައިވެރިވި، 66 މެންބަރުންގެ ތެރެއިން 64 މެންބަރުންގެ ތާއީދާއެކުއެވެ. ނުފެންނަ ކަމަށް ދެ މެންބަރަކު ވަނީ ވޯޓު ދެއްވާފައެވެ.
ސްވިމިން އެސޯސިއޭޝަނުގެ ރައީސްގެ މަގާމަށް ސައްތާރު މި ފަހަރުވެސް އިންތިޚާބުކުރެއްވިއިރު، މި ފަހުން އޭނާ ވަނީ އޭޝިއާ އެކުއަޓިކްސް ބިއުރޯއަށްވެސް އިންތިޚާބުކުރައްވާފައެވެ. މިއީ ރާއްޖޭގެ ބޭފުޅެއް އޭޝިއާ އެކުއަޓިކްސް ބިއުރޯއަށް އިންތިޚާބުވެވަޑައިގެންނެވި ފުރަތަމަ ފަހަރެވެ. މީގެ އިތުރުން ސައްތާރު އަންނަނީ މޯލްޑިވްސް އޮލިމްޕިކް ކޮމިޓީ (އެމްއޯސީ) ރައީސްގެ މަގާމު 2021 ވަނަ އަހަރުން ފެށިގެން ފުރުއްވަމުންނެވެ.
ސްވިމިން އެސޯސިއޭޝަންގެ ނައިބު ރައީސަކަމަށް އިންތިޚާބުވެވަޑައިގެންނެވީ މިހާރުވެސް އެ މަގާމު ފުރުއްވަމުން އަންނަ އިސްމާޢީލް ޢަލީއެވެ. އޭނާއަށް ވަނީ ވޯޓުގައި ބައިވެރިވި 66 މެންބަރުންގެ ތެރެއިން 63 މެންބަރުންގެ ތާއީދު ލިބިވަޑައިގެންފައެވެ.
ހިންގާ ކޮމިޓީގެ އެހެން މަގާމުތަކުގެ ތެރެއިން ހަޒާންދާރަކަށް އަބްދުﷲ ޝަމީމް އިންތިހާބުވީ 63 މެންބަރުންގެ ތާއީދާއެކުއެވެ. އަދި ކުލަބު ތަމްސީލުކުރާ މެންބަރަކަށް އަލީފް އަބްދުﷲ ނަސީމް އިންތިޚާބުވެވަޑައިގެންނެވީ ވޯޓުގައި ބައިވެރިވި ހަތަރު މެންބަރުންގެވެސް ތާއީދާއެކުއެވެ.
ކޯޗުން ތަމްސީލުކުރާ ފަރާތަކަށް އަޙްމަދު ފިރާސް އަފީފް އިންތިޚާބުވެވަޑައިގެންނެވީ 14 މެންބަރުންގެ ތެރެއިން 13 ވޯޓު ހޯއްދަވައިގެންނެވެ. އަދި ޓެކްނިކަލް އޮފިޝަލުން ތަމްސީލުކުރާ މެންބަރަކަށް ހަސަން ސިރާރު ހޮވިވަޑައިގަތީ ވޯޓުލި 13 މެންބަރުންގެވެސް ތާއީދާއެކުއެވެ.
ފަރުދީ މެންބަރުން ތަމްސީލުކުރާ އަންހެން މެންބަރަކަށް ރަހީމާ އާދަމް އިންތިޚާބުވެވަޑައިގެންނެވީ 62 މެންބަރުންގެ ތެރެއިން 60 ވޯޓާއެކުއެވެ. އަދި ފަރުދީ މެންބަރުން ތަމްސީލުކުރާ ފިރިހެން މެންބަރަކަށް މުޙައްމަދު ނައްވާރު އިބްރާހީމް އިންތިޚާބުވެވަޑައިގަތީ 62 މެންބަރުންގެ ތެރެއިން 59 ވޯޓާއެކުއެވެ.
އަލަށް އިންތިޚާބުވި ހިންގާ ކޮމިޓީގެ ހަތަރު އަހަރުގެ ދައުރު ފަށާނީ އަންނަ މަހުގެ 25 އިން ފެށިގެންނެވެ.