ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ނޯތު މާލޭ ޒޯނުގެ ފައިނަލަށް އެންމެ ފަހުގެ ރަނަރަޕް ބަނޑޮސް މޯލްޑިވްސް އާއި ބަރޮސް މޯލްޑިވްސް ދަތުރުކޮށްފިއެވެ.
ނޯތު މާލޭ ޒޯނުގެ ކުޅުން ވަން އެންޑް އޮންލީ ރީތި ރަށުގައި ކުރިއަށްދާއިރު، މިއަދު ހަވީރު ކުޅުނު ސެމީ ފައިނަލް ފުރަތަމަ މެޗުން ބަނޑޮސް މޮޅުވީ އެންމެ ފަހުގެ ޗެމްޕިއަން ރީތި ރަށް އަތުން 3-1 ގެ ނަތީޖާއަކުންނެވެ. މިދިޔަ އަހަރުގެ ފައިނަލުގައި މި ދެ ޓީމު ވާދަކޮށް ރީތި ރަށުން ތަށި އުފުލާލިއިރު، މި އަހަރުގެ މުބާރާތުގެ ގުރޫޕު ސްޓޭޖުގައި މި ދެ ޓީމު ކުޅުނު މެޗު ނިމުނީ 1-1 ގެ ނަތީޖާއަކުން އެއްވަރުވެގެންނެވެ.
މިއަދު ހަވީރު ކުޅުނު ސެމީ ފައިނަލް މެޗު ފަށައިގެން ދެވަނަ މިނެޓުގައި ބަނޑުހޮން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އަޙްމަދު ޝަމީމެވެ. އަދި ފުރަތަމަ ހާފުގެ ފަހު މިނެޓުގައި އަޙްމަދު ރީހާން ވަނީ ލަނޑެއް ޖަހައި، ބަނޑޮހުގެ ލީޑު ފުޅާކޮށްދީފައެވެ.
މި މެޗުގެ ދެވަނަ ހާފު ފަށައިގެން 10 ވަނަ މިނެޓުގައި ބަނޑޮހުން ވަނީ ތިންވަނަ ލަނޑެއް ޖަހާފައެވެ. މި ލަނޑު އެ ޓީމަށް ކާމިޔާބުކޮށްދިނީ ހަސަން މުއާންއެވެ. މި މެޗުގައި ރީތި ރަށުން ކާމިޔާބުކުރި ހަމައެކަނި ލަނޑު، މެޗުގެ 34 ވަނަ މިނެޓުގައި ޖަހައިދިނީ މުޙައްމަދު މުނައްވަރެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ ބަނޑޮހުގެ އިބްރާހިމް މުޝީރެވެ/
މީގެ އިތުރުން ފައިނަލުގެ ޖާގައެއް ބަރޮހުން ހޯދީ މިއަދު ހަވީރު ކުޅުނު ސެމީ ފައިނަލް ދެވަނަ މެޗުގައި 3-0 ގެ ނަތީޖާއަކުން ދަ ރިޓްޒް ކާލްޓަން މޯލްޑިވްސް ބަލިކުރުމަށްފަހުއެވެ.
މި މެޗުގެ 10 ވަނަ މިނެޓުގައި ބަރޮހުން ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީ އަޙްމަދު އަނީސްއެވެ. އަދި ދެވަނަ ހާފު ފަށައިގެން ތިންވަނަ މިނެޓުގައި އަލީ ޒަޔާން އަޙްމަދު ވަނީ ލަނޑެއް ޖަހައި، ބަރޮހުގެ ލީޑު ފުޅާކޮށްދީފައެވެ. އަދި މެޗުގެ 29 ވަނަ މިނެޓުގައި ބަރޮހުގެ ތިންވަނަ ލަނޑު ކާމިޔާބުކޮށްދިނީ މުޙައްމަދު ރާހިފްއެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ބަރޮހުގެ ހުސައިން ވިފާގެވެ.
ނޯތު މާލޭ ޒީނުގެ ފައިނަލުގައި ބަރޮހާއި ބަނޑޮސް ބައްދަލުކުރާއިރު، މި މެޗު ކުޅުމަށް ހަމަޖެހިފައިވަނީ އަންނަ އާދިއްތަ ދުވަހުގެ ހަވީރެވެ.