އިންޓަރނޭޝަނަލް ބޮޑީބޯޑިން ކޯޕަރޭޝަން (އައިބީސީ) ބޮޑީބޯޑިން ވޯލްޑް ޓުއާގައި ހިމެނޭ "މޯލްޑިވްސް ޕްރޯ" މި އަހަރުގެ އޮގަސްޓު މަހު ބޭއްވުމަށް ތާވަލުކޮށްފިއެވެ.
ބޮޑީބޯޑިންގެ އެންމެ މަތީ ފަންތީގެ މުބާރާތްތަކުގެ މައްޗަށް އެކުލަވާލާފައިވާ ވޯލްޑް ޓުއާގައި ހިމެނޭ "މޯލްޑިވްސް ޕްރޯ" އޮންނާނީ އޮގަސްޓު މަހުގެ 1-9 ގެ ނިޔަލަށެވެ. މި މުބާރާތް ވަނީ މިދިޔަ ދެ އަހަރުވެސް ކާމިޔާބުކަމާއެކު މާލޭގެ ވަރުނުލާ ރާޅުގަނޑު ސަރަހައްދުގައި ކުރިއަށް ގެންގޮސްފައެވެ.
މި އަހަރުގެ މޯލްޑިވްސް ޕްރޯގައި ތިން ކެޓެގަރީއެއް ހިމެނެއެވެ. އެއީ މެންސް އޯޕަން އާއި، ވިމެންސް އޯޕަން އަދި ޕްރޯ ޖޫނިއަރ މެންސްއެވެ. މޯލްޑިވްސް ޕްރޯ އަކީ އައިބީސީގެ ދެވަނައަށް އެންމެ އަގުބޮޑު މުބާރާތެވެ.
މިދިޔަ ދެ އަހަރުގެ މުބާރާތުގައި ދުނިޔޭގެ ފެންވަރުގެ ބޮޑީބޯޑަރުންނާ ވާދަކޮށް ރާއްޖޭގެ އެތުލީޓުން ވަނީ ރަނގަޅު ކާމިޔާބީތަކެއް ހޯދާފައެވެ. އެގޮތުން "މޯލްޑިވްސް ޕްރޯ" ގެ ފުރަތަމަ މުބާރާތުގެ ޖޫނިއަރ ބައިގެ ފައިނަލުގައި ރާއްޖޭގެ އާމިން އުމަރު މޫސާ ވާދަކުރިއިރު, ޑްރޮޕް ނީ ކެޓަގަރީގެ ސެމީ ފައިނަލުގައި ރާއްޖޭގައި އުފެދުނު އެންމެ މޮޅު ބޮޑީބޯޑަރު އަލީ ޚުޝްރުވާން އަޙްމަދު (ކުޑަ އައްޔަ) ވަނީ ވާދަކޮށްފައެވެ. އެއާއެކު އެ ދެ އެތުލީޓުންވެސް ވޯލްޑް ރޭންކިންގައި ބޮޑު ކުރިއެރުމެއް ލިބުނުއިރު، މިދިޔަ އަހަރުވެސް ޖޫނިއަރ ކެޓަގަރީގެ ވޯލްޑް ރޭންކިންގައި އާމިން ވަނީ ހިމެނިފައެވެ.
"މޯލްޑިވްސް ޕްރޯ" ގެ ތަޖުރިބާއާއެކު ރާއްޖޭގެ ބޮޑީބޯޑަރުން އަންނަނީ ވޯލްޑް ޓުއާ މުބާރާތްތަކުގައި ބައިވެރިވަމުންނެވެ. އައިބީސީން ހާމަކޮށްފައިވާ ގޮތުން ރާއްޖޭގައި ބާއްވާ މުބާރާތަކީ އިންތިޒާމުގެ ގޮތުންނާއި، ފެންވަރުގެ ގޮތުން ރަނގަޅު މުބާރާތެއް ކަމަށެވެ. އަދި ރާއްޖޭގެ ބޮޑީބޯޑިން ކުރިއެރުވުމަށް ކުރަމުން އަންނަ މަސައްކަތަށް އެ އިދާރާއިން ވަނީ ތައުރީފުކޮށްފައެވެ.
މިދިޔަ އަހަރުގެ މޯލްޑިވްސް ޕްރޯގެ ތެރެއިން ޑްރޮޕް-ނީ ބައިގެ ދުނިޔޭގެ ޗެމްޕިއަންކަން ހަވާއީގެ ޑޭވިޑް ހަބާޑް ހޯދިއިރު، މުބާރާތުގެ އެންމެ ފޯރިގަދަ ބައި ކަމަށްވާ ފިރިހެން ޑިވިޝަންގެ ޗެމްޕިއަންކަން ހޯދީ ފްރާންސްގެ ޕިއޭ ލުއިސް ކޮސްޓޭސްއެވެ. މޯލްޑިވްސް ޕްރޯގެ ޑްރޮޕް ނީ ޑިވިޝަން ކާމިޔާބުކޮށް، އެ ބައިގެ ދުނިޔޭގެ ޗެމްޕިއަންކަން ހަބާޑް ހޯދިއިރު، މިއީ ދުނިޔޭގެ ފެންވަރުގެ ޓްރޮފީއެއް އައިބީސީ ރޭންކިންގެ ކުޅުންތެރިއަކު ރާއްޖޭގައި އުފުލާލި ފުރަތަމަ ފަހަރެވެ.