އަންނަ ޖޫން މަހު ޖަރުމަނުގައި ފެށުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތުގައި ވާދަކުރާ ޑެންމާކުގެ ސްކޮޑުގައި ތަޖުރިބާކާރު މިޑްފީލްޑަރު ކްރިސްޓިއަން އެރިކްސަން އަނެއްކާވެސް ހިމަނައިފިއެވެ.
އެންމެ ފަހުން 2021 ވަނަ އަހަރު ބޭއްވި ޔޫރޯ ފުޓްބޯޅަ މުބާރާތުގައި ފިންލެންޑާ ދެކޮޅަށް ކުޅުނު މެޗުގެ ފުރަތަމަ ހާފުގައި އެރިކްސަން ވަނީ ހާޓްއެޓޭކެއް ޖެހި ހިތް ހުއްޓިގެން ދަނޑުގެ އަރިމައްޗަށް ވެއްޓިފައެވެ. އަދި ދަނޑުމަތީގައި ފަރުވާދިނުމަށްފަހު، އެރިކްސަން ހޭއެރުމުން ވަނީ ވަގުތުން ހޮސްޕިޓަލަށް ގެންގޮސް ފަރުވާދީފައެވެ. އެރިކްސަންއަށް ދިމާވި ހިތުގެ މައްސަލައަށްފަހު މިހާރު އޭނާ ކުޅެމުން އަންނަނީ ހިތަށް ހޮޅިކޮޅެއް ލައްވައިގެންނެވެ.
މި ފަހަރުގެ ޔޫރޯ ފުޓްބޯޅަ މުބާރާތައް ނިކުންނަ ޑެންމާކު ޓީމުގައި އެރިކްސަން އާއެކު މެންޗެސްޓާ ޔުނައިޓެޑަށް ކުޅެމުން އަންނަ ފޯވާޑް ރަސްމުސް ހޮއިލުންޑްވެސް ހިމެނެއެވެ. މީގެ އިތުރުން ޑެންމާކުގެ ކޯޗު ކެސްޕާ ހޮލްމަންޑް އެކުލަވާލި 26 ކުޅުންތެރިންގެ ސްކޮޑުގައި އެ ޓީމުގެ ކެޕްޓަން ސިމޯން ކިއޭ ވަނީ ހިމަނާފައެވެ. އެކަމަކު އިޓަލީގެ އޭސީ މިލާނަށް ކުޅުނު ޑިފެންޑަރަށް މި ފަހުން ލިބުނު އަނިޔާއަކާ ގުޅިގެން، ސީޒަނުގެ ފަހުކޮޅު ކުޅުނު ބައެއް މެޗުތައް އޭނާއަށް ވަނީ ގެއްލިފައެވެ.
އަންނަ މަހު ފެށުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތުގައި ޑެންމާކު ހިމެނެނީ ގްރޫޕް ސީގައެވެ. މި ގުރޫޕުގައި ދެން ހިމެނެނީ އިންގްލަންޑާއި، ސްލޮވޭނިއާ އަދި ސާބިއާއެވެ.