ސްރީ ލަންކާގެ ކެންޑީގައި ކުރިއަށްދިޔަ ސައުތު އޭޝިއަން ޔޫތު ޓޭބަލް ޓެނިސް ޗެމްޕިއަންޝިޕުން ރާއްޖެއަށް ހަތަރު މެޑަލް ލިބިއްޖެއެވެ.
އެ ގޮތުން، ރާއްޖޭން ކާމިޔާބުކުރީ އެއް ރިހިމެޑެއްޔާއި ތިން ލޯ މެޑެއްޔެވެ. ރާއްޖެއަށް ރިހި މެޑަލް ލިބުނީ 19 އަހަރުން ދަށުގެ މިކްސް ޑަބަލްސް ބައިންނެވެ. މި ބައިގެ ފައިނަލުގައި ރާއްޖޭގެ ފާތިމަތު ދީމާ އަލީ އާއި އަޚްޔަރު އަޙްމަދު ޚާލިދުގެ ޕެއާ ވާދަކުރިއިރު، އެ ޕެއާ ވަނީ އިންޑިއާގެ ބެޓަޖީ އާއި ޕްރިތާގެ ޕެއާ އަތުން ސީދާ ތިން ސެޓުން ބަލިވެފައެވެ. މި މެޗުގެ ސެޓުތައް ދިޔައީ 11-9، 14-12 އަދި 11-8 އިންނެވެ.
މީގެ އިތުރުން މި މުބާރާތުގެ 19 އަހަރުން ދަށުގެ އަންހެން ޑަބަލްސް ބައިން ދީމާ އާއި މިޝްކާ މުޙައްމަދު އިބްރާހީމްގެ ޕެއާ ލޯ މެޑަލް ހޯދިއިރު، 19 އަހަރުން ދަށުގެ ފިރިހެން ޑަބަލްސް ބައިން ރާއްޖޭގެ އުމީރު މުޙައްމަދު މުއިއްޒު އާއި އަޚްޔަރުގެ ޕެއާވެސް ވަނީ ލޯ މެޑަލް ހޯދާފައެވެ. އަދި 15 އަހަރުން ދަށުގެ އަންހެން ޑަބަލްސް ބައިން އައިޝަތު އަލްސާ ނާފިޒާއި އައިޝަތު މަލާކް ތާސީންގެ ޕެއާވެސް ވަނީ ލޯ މެޑަލް ހޯދާފައެވެ.
ކެންޑީގައި ކުރިއަށްދިޔަ ދެކުނު އޭޝިއާގެ ޔޫތު މުބާރާތުގެ ނިންމުމުގެ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ އަނބިކަނބަލުން ސާޖިދާ މުޙައްމަދެވެ.