އެންމެ ރަނގަޅު ކުޅިވަރު އެސޯސިއޭޝަނެއް ހޮވުމަށް "ސްޓްރައިޑްސް އޮފް ސަކްސެސް" ރިޕޯޓު އެސޯސިއޭޝަންތައް މެދުވެރިކޮށް ހޯދާފައިވާނެ ކަމަށް މޯލްޑިވްސް ސްޕޯޓްސް އެވޯޑްސް 2024 ގެ ޖަޖުންގެ ކޮމިޓީން ބުނެފިއެވެ.
މޯލްޑިވްސް ސްޕޯޓްސް އެވޯޑްސްގެ ހަފުލާ ބޭއްވުމަށް ހަމަޖެހިފައިވަނީ އަންނަ ޖޫން މަހުގެ 27 ވަނަ ދުވަހެވެ. ރާއްޖޭގެ 18 ކުޅިވަރު އެސޯސިއޭޝަނަކުން މި ފަހަރު އެވޯޑަށް ނަން ހުށަހެޅުމަށް ހުޅުވާލި ފުރުސަތުގައި ވަނީ ނަން ހުށަހަޅާފައެވެ.
މޯލްޑިވްސް ސްޕޯޓްސް އެވޯޑްސްގެ ތައްޔާރީތަކާ ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ޖަޖިން ޕެނަލްގެ ޗެއަރ އަބްދުލް ނާފިއު ތައުފީގު ވިދާޅުވީ އެސޯސިއޭޝަންތަކުން ކުރާ މަސައްކަތްތަކުގެ ތަފްސީލީ މައުލޫމާތު ހިމެނޭ "ސްޓްރައިޑްސް އޮފް ސަކްސެސް" ރިޕޯޓު ހުށަހަޅަން ކޮންމެ އެސޯސިއޭޝަނަކަށްވެސް އަންގާފައިވާނެ ކަމަށެވެ. އަދި ކަމަށް ބޮޑު ތަރުހީބެއް ލިބުނު ކަމަށްވެސް ވަނީ ވިދާޅުވެފައެވެ.
މީގެ އިތުރުން ނާފިއު ވަނީ އެސޯސިއޭޝަންތަކުގެ ހިންގުމާއި ލިޔެކިޔުންތައް ބެލެހެއްޓުން ކުރިއަށް ވުރެ ހަރުދަނާވެފައިވާކަން ނާފިއު ފާހަގަކުރައްވާފައެވެ.
"މި މައުލޫމާތުތަކަކީ އެހެންޏާ ހޯދަން އުނދަގޫ އެއްޗެއް. މި އިންޕުޓް އަޅުގަނޑުމެން ގިނަ ފަހަރަށް ހޯދަނީ އޭޖީއެމްއެއް ބާއްވާފައި، އޭގެ ފަހުން ކޮމިޝަނަރ އޮފް ސްޕޯޓްސްއަށް ސަބްމިޓް ކުރާ ޑޮކިއުމަންޓެއްގެ ޒަރިއްޔާއިން.އަބްދުލް ނާފިއު ތައުފީގު - ޖަޖިން ޕެނަލްގެ ޗެއަރ
މި ފަހަރުގެ މޯލްޑިވްސް ސްޕޯޓްސް އެވޯޑުގެ ޖަޖުން ޕެނަލްގައި ހިމެނެނީ ގައުމީ ބާސްކެޓްބޯޅަ ޓީމުގެ ކުރީގެ ކުޅުންތެރިޔާ ނާފިއުގެ އިތުރުން ފީފާ އަދި އޭއެފްސީގެ މެޗު ކޮމިޝަަނަރު އަޙްމަދު ޝާހިރާއި، ކުރީގެ ފީފާ ރެފުރީ އަލީ ސަލީމާއި، ޓޭބަލް ޓެނިސް އެސޯސިއޭޝަންގެ ކުރީގެ ޖެނެރަލް ސެކްރެޓަރީ އިސްމާޢީލް ސުޖާއު އަދި ގައުމީ ސްޕޯޓްސް ކައުންސިލުގެ މެންބަރު އާމިނަތު ނާޝިދެވެ.