ބާސެލޯނާގެ ކޯޗުގެ މަގާމުން ޒަވީ ހެނާންޑޭޒް ވަކިކޮށް، އެ މަގާމަށް ޖަރުމަނުގެ ކޯޗު ހަންސީ ފްލިކް ހަމަޖައްސައިފިއެވެ.
ޖަރުމަނުގެ ގައުމީ ޓީމުގެ ކޯޗުގެ މަގާމުން މިދިޔަ ސެޕްޓެމްބަރު މަހު ފްލިކް ވަކިކުރިއިރު، އޭނާ ބާސެލޯނާގެ ކޯޗުގެ މަގާމާ ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ.
ބާސެލޯނާގެ ކޯޗުގެ މަގާމުން ޒަވީ ވަކިކުރިއިރު، މިދިޔަ ޖެނުއަރީ މަހު ޒަވީ ވަނީ މި ސީޒަން ނިމުމުން ބާސެލޯނާގެ ކޯޗުކަން ދޫކޮށްލާނެކަން އިއުލާނުކޮށްފައެވެ. އެކަމަކު ތަކުރާރުކޮށް ބާސެލޯނާއިން ކުރިއަށްގެންދިޔަ މަޝްވަރާތަކަށްފަހު، ޒަވީ އެ ނިންމުން ބަދަލުކުރި ނަމަވެސް، ނޫސްވެރިންގެ ބައްދަލުވުމެއްގައި ޒަވީ ދެއްކި ވާހަކަތަކެއްގެ ސަބަބުން އޭނާ ވަކިކުރަން ބާސެލޯނާގެ ބޯޑު މެންބަރުން ވަނީ ނިންމާފައެވެ.
އެއާއެކު ބާސެލޯނާއިން އެ ޓީމުގެ ކޯޗުގެ މަގާމަށް ފްލިކް ހަމަޖެއްސިއިރު، އޭނާ ވަނީ 2020 ވަނަ އަހަރު ބަޔާން މިޔުނިކަށް ޖަރުމަން ލީގާއި، ޖަރުމަން ކަޕް އަދި ޔުއެފާ ޗެމްޕިއަންސް ލީގު ކާމިޔާބުކޮށްދީފައެވެ. އަދި ފްލިކް ވަނީ އެ ޓީމާއެކު ޖުމްލަ ހަތް ތަށި ހޯދާފައެވެ.
މަގާމާ ހަވާލުވުމަށްފަހު ފްލިކް ބުނީ މިއީ ލިބުނު ޝަރަފެއް ކަމަށާއި، އަދި މިއީ ހުވަފެނެއް ހަގީގަތަކަށް ވުން ކަމަށެވެ. އަދި ބަޔާންގައި ގިނަ ކާމިޔާބީތަކެއް ލިބުނުއިރު، އެ ފަދަ ކާމިޔާބީތަކެއް ބާސެލޯނާއާއެކުވެސް ހޯދަން ބޭނުންވާ ކަމަށްވެސް ވަނީ ބުނެފައެވެ. ފްލިކް ބުނީ ކޮންމެ އައު ޗެލެންޖަކީވެސް ޕްރެޝަރުތަކަކާ އެކު އަންނަ ކަމެއް ކަމަށާއި، ބާސެލޯނާގައި ރަނގަޅު މަސައްކަތްތަކެއް ކުރެވޭނެ ކަމުގެ ޔަގީންކަން އެބައޮތް ކަމަށެވެ.
ބެލެވޭ ގޮތުގައި ފްލިކް، ބާސެލޯނާގެ ބޯޑު މެންބަރުންނާއެކު ވަރަށް އަވަހަށް ބައްދަލުކޮށް، އެ ޓީމުގެ ކުރިމަގާއި މެދު ދެކޭ ގޮތްތަށް ހިއްސާކުރާނެއެވެ.