ގައުމީ ބޮޑީބޯޑީން ލީގުގެ އެންމެ ފުރަތަމަ މުބާރާތް ކަމަށްވާ ބުރުނު ޝިކާރު 2024 ގެ ޗެމްޕިއަންކަން ރާއްޖޭގެ އެންމެ ކާމިޔާބު ބޮޑީބޯޑަރު އަލީ ޚުޝްރުވާން އަޙްމަދު (ކުޑަ އައްޔަ) ހޯދައިފި އެވެ.
މި އަހަރުގެ ބުރުނު ޝިކާރުގެ އޯޕަން ބައިގެ ޗެމްޕިއަންކަން ހޯދުމާއެކު ކުޑަ އައްޔަ މި ވަނީ މި މުބާރާތް މިހާތަނަށް ފަސް ފަހަރު ކާމިޔާބުކޮށްފައެވެ. ބުރުނު ޝިކާރު މިހާތަނަށް ހަ އަހަރު ބާއްވާފައިވާއިރު، ކުޑަ އައްޔައަށް މިހާތަނަށް ގެއްލުނު ހަމައެކަނި މުބާރާތަކީ މިދިޔަ އަހަރުގެ މުބާރާތެވެ. އެގޮތުން މިދިޔަ އަހަރުގެ އޯޕަން ބަައިގެ ފައިނަލުގައި ކުޑަ އައްޔަ ބަލިކޮށް ޗެމްޕިއަންކަން ހޯދީ އަޝްރަފް ހަސަނެވެ.
މާލޭ ރާޅުގަނޑު ސަރަހައްދުގައި ބޭއްވި މި އަހަރުގެ މުބާރާތުގެ ފައިނަލް ހީޓުތައް ވަނީ މިއަދު ކުރިއަށްގެންގޮސްފައެވެ. އެގޮތުން މި ފަހަރުގެ އޯޕަން ބައިގެ ފައިނަލުގައި ކުޑަ އައްޔައާ ވާދަކުރީ އަލީ ޖާވިދު (ޖާއްޓެ) އެވެ. ޖާއްޓެއާ ވާދަކޮށް ކުޑަ އައްޔަ ފައިނަލް ހީޓު ކާމިޔާބުކުރީ 11.67 ސްކޯކޮށްގެންނެވެ. ޖާއްޓެއަށް ސްކޯކުރެވުނީ 9.77 އެވެ.
މީގެ އިތުރުން މި އަހަރުގެ މުބާރާތުގެ ޑްރޮޕް ނީ ކެޓަގަރީވެސް ކާމިޔާބުކޮށްފައިވަނީ ކުޑަ އައްޔައެވެ. ފައިނަލް ހީޓުގައި ޒުވާން ތަރި އާމިން އުމަރު މޫސާއާ ކުޑަ އައްޔަ ވާދަކުރިއިރު، އޭނާ ވަނީ 10.00 ސްކޯކޮށްފައެވެ. އާމިންއަށް ސްކޯކުރެވުނީ 6.67 އެވެ.
މި އަހަރުގެ މުބާރާތުގެ ޖޫނިއަރ ބައިގެ ޗެމްޕިއަންކަން ހޯދީ މުޙައްމަދު އަޒާން އަޙްމަދެވެ. ފައިނަލުގައި މުޙައްމަދު ޖަރީޝް ޖިހާދުއާ ވާދަކުރިއިރު، އަޒާން ވަނީ 9.80 ސްކޯކޮށްފައެވެ. އަދި ޖަރީޝްއަށް ސްކޯކުރެވުނީ 8.10 އެވެ.
މި އަހަރުގެ ބުރުނު ޝިކާރުގެ އޯޕަން ބައިގައި 24 ބޮޑީބޯޑަރުން ވަނީ ވާދަކޮށްފައެވެ. ޑްރޮޕް ނީ ކެޓަގަރީގައި 15 ބޮޑީބޯޑަރުން ވާދަކުރިއިރު، ޖޫނިއަރ ބައިގައި 11 ބޮޑީބޯޑަރުން ވަނީ ވާދަކޮށްފައެވެ.