އަންނަ މަހު ޖަރުމަނުގައި ފެށުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތުގައި ވާދަކުރާ ބެލްޖިއަމް ޓީމުގައި އެތުލެޓިކޯ މެޑްރިޑުގެ ޑިފެންޑަރު އެކްސެލް ވިޓްސެލް ހިމަނައިފިއެވެ.
އަންނަ މަހުގެ 15 ވަނަ ދުވަހު ޖަރުމަރުނައި ފެށުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތަށް ބެލްޖިއަމުން އެކުލަވާލި 25 ކުޅުންތެރިންގެ ޕްރޮވިޝަނަލް ސްކޮޑުގައި ވިޓްސެލް ހިމެނިއިރު، ބެލްޖިއަމްގެ ޓީމަށް 130 މެޗު ކުޅެދީފައިވާ އުމުރުން 35 އަހަރުގެ ވިޓްސެލް ވަނީ މިދިޔަ އަހަރުގެ މެއި މަހު ގައުމީ ޓީމަށް ކުޅުން ހުއްޓާލިކަން އިއުލާންކޮށްފައެވެ. އެހެން ނަމަވެސް މިިފަހަރުގެ ޔޫރޯގައި އޭނާ ކުޅުމަށް ބެލްޖިއަމްގެ ކޯޗު ޑޮމެނިކޯ ޓޮޑެސްކޯ އެދުމުން ވިޓްސެލް ވަނީ އަލުން ގައުމީ ޓީމަށް ކުޅުމަށް ނިންމާފައެވެ.
މި ފަހަރުގެ ބެލްޖިއަމްގެ ޓީމުން އެންމެ ބޮޑަށްފާހަގަވެގެން ދަނީ އެ ޓީމުގެ އެއް ނަންބަރު ގޯލްކީޕަރު ތިބައޫ ކޯޓުއާ މި ފަހަރުގެ ސްކޮޑުގައި ނެތުމެވެ. ލިބުނު އަނިޔާތަކެއްގެ ސަބަބުން ކޯޓުއާއަށް ވަނީ މި ސީޒަނުގެ ގިނަ މެޗުތަކެއް ގެއްލިފައެވެ. ކޯޓުއާގެ ބަދަލުގައި ބެލްޖިއަމުގެ ސްކޮޑުގައި ކީޕަރުންގެ ގޮތުގައި ހިމަނާފައިވަނީ ވުލްފްސްބާގުގެ ކޮއެން ކެސްޓީލްސް އާއި، ލޫޓަން ޓައުންގެ ތޯމަސް ކަމިންސްކީ އަދި ނޮޓިންހަމް ފޮރެސްޓުގެ މެޓްޒް ސެލްސްއެވެ.
ޑިފެންޑަރުންގެ ތެރޭގައި ފާހަގަކޮށްލެވޭ ކުޅުންތެރިންގެ ތެރޭގައި ވިޓްސެލްގެ އިތުރުން ޓިމޮތީ ކަސްޓަންޏޭ އާއި ޔާން ވަޓޮންގަން ހިމެނެއެވެ. އަދި މިޑްފީލްޑަރުންގެ ތެރޭގައި ކެވިން ޑި ބްރޭނާ އާއި، އަމަޑޫ އޮނާނާ އަދި ޔޫރީ ޓިއެލެމަންސް ފާހަގަކޮށްލެވެއެވެ. މީގެ އިތުރުން ބެލްޖިއަމުގެ ސްކޮޑުގައި ހިމެނޭ ފޯވާޑުންނަށް ބަލާލާއިރު ޖެރެމީ ޑޯކޫ އާއި، ރޮމެލޫ ލުކާކޫ އަދި ލިއަންޑްރޯ ޓްރޮސާޑް ފާހަގަކޮށްލެވެއެވެ.
ބެލްޖިއަމުން 25 ކުޅުންތެރިންގެ ޕްރޮވިޝަނަލް ސްކޮޑެއް އިއުލާންކުރިއިރު، މި ފަހަރުގެ ޔޫރޯގައި ކޮންމެ ޓީމަކަށްވެސް ފައިނަލް ސްކޮޑުގައި ގިނަވެގެން 26 ކުޅުންތެރިން ހިމެނޭނެއެވެ.