ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ނޯތު މާލޭ ޒޯނުގެ ކުއާޓާ ފައިނަލް ފުރަތަމަ މެޗުގައި ހުވަފެން ފުށި ބަލިކޮށް، ސެމީ ފައިނަލުގެ ޖާގައެއް އެންމެ ފަހުގެ ޗެމްޕިއަން ވަން އެންޑް އޮންލީ ރީތި ރަށުން ހޯދައިފިއެވެ.
ނޯތު މާލޭ ޒޯނުގެ ކުޅުން ރީތި ރަށުގައި ކުރިއަށްދާއިރު، މިއަދު ހަވީރު ކުޅުނު ކުއާޓާގެ މެޗުން އެ ޓީމު މޮޅުވީ 5-2 ގެ ނަތީޖާއަކުންނެވެ.
ފޯރިގަދަ ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު ރީތި ރަށުން ވަނީ ލީޑު ނަގާފައެވެ. މެޗު ފަށައިގެން ދެވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު ނާފިއުއެވެ.
މި ދެވަނަ ހާފުގައި ރީތި ރަށުގެ ފަރާތުން ވަނީ މޮޅު ކުޅުމެއް ފެނިގެންދިޔައިރު، މި ހާފު ފަށައިގެން ތިންވަނަ މިނެޓުގައި ގާއިދު ގާސިމް ވަނީ ލަނޑެއް ޖަހައި، އެ ޓީމުގެ ލީޑު ފުޅާކޮށްދީފައެވެ. ނަމަވެސް އޭގެ ތިން މިނެޓު ފަހުން ހުވަފެން ފުށިން ވަނީ ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އަޙްމަދު އައިމަނެވެ.
ނަމަވެސް އޭގެ އިރުކޮޅެއް ފަހުން ނާފިއު ވަނީ އިތުރު ލަނޑެއް ޖަހައި، ރީތި ރަށަށް އަނެއްކާވެސް ލީޑު ފުޅާކޮށްދީފައެވެ. އަދި އިބްރާހީމް ޒިޔާން އާއި މަޖްދާން ސާލިހު ގާތްގާތުގައި ޖެހި ދެ ލަނޑާއެކު ރީތި ރަށުން ވަނީ ފަރަގު ބޮޑުކޮށްފައެވެ. މި މެޗުގައި ހުވަފެން ފުށިން ކާމިޔާބުކުރި ދެވަނަ ލަނޑު މެޗުގެ ފަހު މިނެޓުގައި ޖަހައިދިނީ އައިމަނެވެ.
މި މެޗުން މޮޅުވެ ރީތި ރަށް ސެމީއަށް ދަތުރުކުރިއިރު، ބޯކޮށް ވާރޭވެހި ފެން ބޮޑުވުމާ ގުޅިގެން، މިއަދު ހަވީރު ކުޅެން ހަމަޖެހިފައި އޮތް ބަނޑޮސް މޯލްޑިވްސް އާއި ވަރު ބައި އެޓްމޮސްފެއާގެ ކުއާޓާގެ މެޗު ވަނީ ފަސްކޮށްފައެވެ.