ދުނިޔޭގެ އެންމެ އަގުބޮޑު ފުޓްބޯޅަ މެޗު ކަމަށްވާ އިނގިރޭސި ޗެމްޕިއަންޝިޕުގެ ޕްލޭއޮފް މެޗުގައި ލީޑްސް ޔުނައިޓެޑް ބަލިކޮށް، އިނގިރޭސި ޕްރިމިއަރ ލީގަށް ސައުތެމްޓަން ޕްރޮމޯޓުވެއްޖެއެވެ.
ވެމްބްލީ ސްޓޭޑިއަމްގައި ރޭ ކުޅުނު މެޗު ސައުތެމްޓަނުން ކާމިޔާބުކުރީ 1-0 ގެ ނަތީޖާއަކުންނެވެ. މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 24 ވަނަ މިނިޓްގައި ކާމިޔާބުކޮށްދިނީ އެޑަމް އާމްސްޓްރޯންގެވެ/
އިނގިރޭސި ދެވަނަ ޑިވިޝަން ކަމަށްވާ ޗެމްޕިއަންޝިޕުގެ ޗެމްޕިއަން ލެސްޓާ ސިޓީ އާއި، ރަނަރަޕް އިސްޕްވިޗް ޓައުންއަށް މީގެ ކުރިން ވަނީ ޕްރިމިއަރ ލީގުގެ ފުރުސަތު ލިބިފައެވެ. އަދި ރޭގެ މޮޅާއެކު އަންނަ ސީޒަނުގެ ޕްރިމިއަރ ލީގަށް ސައުތެމްޓަން ޕްރޮމޯޓުވިއިރު، އެ ޓީމު މިދިޔަ ސީޒަނުގައި ޕްރިމިއާ ލީގުން ރެލިގޭޓްވީ، 11 ސީޒަނަށް ފަހުއެވެ.
މި މެޗު އެންމެ އަގުބޮޑު މެޗުގެ ގޮތުގައި މަޝްހޫރުވެފައިވާއިރު، މި ފަހަރު މޮޅުވި ސައުތެމްޓަނަށް 178 މިލިއަން ޑޮލަރު ލިބޭނެއެވެ.