ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ނޯތު މާލޭ ޒޯނުގެ ކުއާޓާ ފައިނަލަށް ހުވަފެން ފުއްޓާއި ވަރު ބައި އެޓްމޮސްފެއާ ދަތުރުކޮށްފިއެވެ.
ވަން އެންޑް އޮންލީ ރީތި ރަށުގައި ކުރިއަށްދާ ނޯތު މާލޭ ޒޯނުގައި މިއަދު ގްރޫޕް ބީގެ ފަހު މެޗުތައް ކުޅުނުއިރު، މި ގުރޫޕުގެ އެއްވަނަ ހޯދާފައިވަނީ 2-1 ގެ ނަތީޖާއަކުން ޕަޓީނާ މޯލްޑިވްސް ބަލިކުރި ވަރު ބައި އެޓްމޮސްފެއާއެވެ. އެއާއެކު އެ ޓީމަށް ވަނީ ކުޅުނު ތިން މެޗުން ހަ ޕޮއިންޓް ލިބިފައެވެ
މިއަދު ހަވީރު ކުޅުނު މެޗުގައި ވަރު ބައި އެޓްމޮސްފެއާއިން ކާމިޔާބުކުރި ދެ ލަނޑުވެސް، މެޗުގެ ފުރަތަމަ ހާފުގައި ޖަހައިދިނީ މުޙައްމަދު ފަޒީލެވެ. އެކަމަކު މެޗުގެ ފަހު މިނެޓުގައި އިބްރާހީމް ސަރުވާން ވަނީ ޕަޓީނާގެ ހަމައެކަނި ލަނޑު ކާމިޔާބުކޮށްދީފައެވެ. މި މެޗުގެ މޮޅު ކުޅުންތެރިއަކަށް ހޮވުނީ މި މެޗުގައި ގިނަ ސޭވްތަކެއް ކުރި ވަރު ބައި އެޓްމޮސްފެއާގެ ގޯލްކީޕަރު އަޙްމަދު މިމްރާހެވެ.
މީގެ އިތުރުން މިއަދު އޮބްލޫ އެކްސްޕީރިއެންސް އަތުން 5-4 ގެ ނަތީޖާއަކުން ބަލިވި ނަމަވެސް، ފައިދާ ލަނޑުގެ ތަފާތުން ގުރޫޕުގެ ދެވަނަ ހުވަފެން ފުއްޓަށް ވަނީ ލިބިފައެވެ. ގްރޫޕް ސްޓޭޖުގައި ކުޅުނު ތިން މެޗުން ހުވަފެން ފުއްޓާއި އޮބްލޫއަށް ލިބިފައިވަނީ ހަތަރު ޕޮއިންޓެވެ.
މި މެޗުގައި އޮބްލޫގެ ޝަމްވީލް އިބްރާހިމް ހެޓްރިކެއް ހެދިއިރު، އެ ޓީމުގެ މުޙައްމަދު ސަހާއު އަލީ ވަނީ ދެ ލަނޑު ޖަހާފައެވެ. މި މެޗުގައި ހުވަފެން ފުށީގެ އަޙްމަދު އައިމަން ހެޓްރިކެއް ހެދިއިރު، އެ ޓީމުގެ އަނެއް ލަނޑު ޖަހައިދިނީ މުޙައްމަދު އަތީދެވެ. މި މެޗުގެ މޮޅު ކުޅުންތެރިއަކަށް ހޮވުނީ އޮބްލޫގެ ޝަމްވީލެވެ.
މި ގްރޫޕުގެ އެއްވަނަ ލިބުމާއެކު ކުއާޓާ ފައިނަލުގައި ވަރު ބައި އެޓްމޮސްފެއާ ކުޅެން ޖެހޭނީ ބަނޑޮސް މޯލްޑިވްސްއާއެވެ. އަދި ހުވަފެން ފުށި ބައްދަލުކުރާނީ އެންމެ ފަހުގެ ޗެމްޕިއަން ރީތި ރަށާއެވެ.