ފްރާންސްގެ ވެރިރަށް ޕެރިހުގައި ބާއްވާ އޮލިމްޕިކް ގޭމްސްގައި ވާދަކުރުމުގެ ފުރުސަތު ރާއްޖޭގެ ބެޑްމިންޓަން ތަރި ފާތިމަތު ނަބާހާ (ނަބާ) އަށް ލިބިއްޖެއެވެ.
ޓްރައިޕާޓައިޓް އިންވިޓޭޝަނަލް ފުރުސަތެއްގައި ނަބާއަށް މި ފުރުސަތު ލިބުނުއިރު، އޭނާ ވަނީ އެންމެ ފަހުން 2020 ވަނަ އަހަރު ޖަޕާނުގެ ވެރިރަށް ޓޯކިއޯގައި ބޭއްވި އޮލިމްޕިކްސްގައިވެސް ވާދަކޮށްފައެވެ. އަދި އެ ފަހަރުގެ އޮލިމްޕިކްސް ހުޅުވުމުގެ ރަސްމިއްޔާތުގައި ދިވެހި ދިދަ އުފުލާލުމުގެ ޝަރަފުވެސް ނަބާއަށް ވަނީ ލިބިފައެވެ. އެއާއެކު ނަބާއަށް މި ވަނީ ޖެހިޖެހިގެން ދެވަނަ އޮލިމްޕިކްސްއިން ފުރުސަތު ލިބިފައެވެ.
މިއީ މިދިޔަ ހަތަރު އަހަރެއްހާ ދުވަހު، ބައިނަލްއަގުވާމީ މުބާރާތްތަކުގައި ނަބާ ދެއްކި ޕާފޯމަންސަށް ބެލުމަށްފަހު ލިބިގެންދިޔަ ފުރުސަތެކެވެ. އެގޮތުން ބައިނަލްއަގުވާމީ މައިދާނުގައި ނަބާއަށް ރަނގަޅު ތަޖުރިބާތަކެއް ލިބިގެންދިޔައިރު، އޭނާ ވަނީ މިދިޔަ އަހަރު ޗައިނާގެ ހަންގްޖޯގައި ކުރިއަށްދިޔަ 19 ވަނަ އޭޝިއަން ގޭމްސްގެ ބެޑްމިންޓަން އަންހެން ސިންގަލްސްގެ ގަދަ 16 ބުރުގައިވެސް ވާދަކޮށްފައެވެ.
މި ފަހަރުގެ އޮލިމްޕިކްސްގައި ރާއްޖޭން ފުރަަތަަމަ ފަހަރަށް ހަަތަރު ކުޅިވަރެއްގައި ވާދަކުރާނެއެވެ. އެގޮތުން އިންވިޓޭޝަނަލް ފުރުސަތުތަކުގައި ބެޑްމިންޓަނުގެ އިތުރުން ސްވިމިން އަދި އެތުލެޓިކްސްގައިވެސް ވާދަކުރާއިރު، ދެކުނު އޭޝިއާ ކޮލިފައިން ކާމިޔާބުކޮށް ޓޭބަލް ޓެނިސް ތަރި ފާތިމަތު ދީމާ އަލީއަށްވެސް ވަނީ ފުރުސަތު ލިބިފައެވެ. އެއާއެކު ދީމާ ވެފައިވަނީ ދުނިޔޭގެ އެންމެ ޝަރަފުވެރި ކުޅިވަރު މުބާރާތް ކަމަށްވާ އޮލިމްޕިކްސްއަށް ކޮލިފައިވި ރާއްޖޭގެ ފުރަތަމަ އެތުލީޓަށެވެ.
މީގެ ކުރިން ތިން އޮލިމްޕިކްސްއެއްގައި ރާއްޖޭގެ ދުވުންތެރިތާ އަޙްމަދު ޝަގީފް (ރިވަރިން) ވަނީ ވާދަކޮށްފައެވެ. އަދި ދެ އޮލިމްޕިކްސްއެއްގައި ވާދަކުރި ދުވުންތެރިންގެ ތެރޭގައި ހުސެއިން ހަލީމް (ކުޑަ ހުސެން) އާއި، ނަސީރު އިސްމާޢީލާއި، މުޙައްމަދު އާމިރާއި، ހުސެއިން ރިޔާޒް އަދި ހަސަން ސާއިދު ހިމެނެއެވެ. އަދި ސްވިމިން އިން ހަސަން މުބާހު އާއި، އައިމިނަތު ރޫޔާ ހުސެއިން އަދި އައިމިނަތު ސަަޖަންވެސް ވަނީ ދެ އޮލިމްޕިކްސްއެއްގައި ވާދަކޮށްފައެވެ.