ޖެމެއިކާގައި ކުރިއަށްދިޔަ "ޖޭއޭއޭއޭ އޯލް ކަމާސް މީޓް" ގައި ވާދަކޮށް, އަންހެނުންގެ 100 މީޓަރުގެ ދުވުން 12 ސިކުންތަށް ވުރެ އަވަހަށް ނިންމި ދިވެހި ފުރަތަމަ އަންހެން އެތުލީޓުގެ ޝަރަފު މަރިޔަމް ރޫޔާ އަލީ ހޯދައިފިއެވެ.
ޖެެމެއިކާގައި ތަމްރީނު ހަދަމުން އަންނަ ރޫޔާ، އަންހެނުންގެ 100 މީޓަރު ދުވުމުގެ ގައުމީ ރިކޯޑު މުގުރާލީ 11.87 ސިކުންތުން ރޭސް ނިންމައިގެންނެވެ. މިއީ ރާއްޖޭގެ ތާރީޚުގައިވެސް އަންހެން އެތުލީޓަކު، 100 މީޓަރުގެ ދުވުން 12 ސިކުންތަށް ވުރެ އަވަހަށް ނިންމި ފުރަތަމަ ފަހަރެވެ.
މީގެ ކުރިން މި މަހުގެ ކުރީކޮޅު ޖެމެއިކާގައި ކުރިއަށްދިޔަ "ޖޭއޭއޭއޭ އޯލް ކަމާސް މީޓް" ގައި ރޫޔާ ވަނީ 100 މީޓަރުގެ ދުވުން، 12.02 ސިކުންތުން ނިންމައި، ގައުމީ ރިކޯޑު މުގުރާލާފައެވެ. އޭރު މި ރިކޯޑު އޮތީ 2022 ވަނަ އަހަރުގެ ކޮމަންވެލްތު ގޭމްސްގައި ވާދަކުރި އައިޝަތު ހިމްނާ ހަަސަންގެ އަތުގައެވެ. ހިމްނާ އެ ފަހަރު ރިކޯޑު މުގުރާލީ، 21 އަހަރު ވަންދެން އެ ރިކޯޑު އޮތް ޝަމްހާ އަޙްމަދުގެ ޓައިމިން އަށްވުރެ އަވަހަށް ނިންމައިގެންނެވެ. އެއީ 12.17 ސިކުންތުން ރޭސް ނިންމައިގެންނެވެ.
ބޭންކް އޮފް މޯލްޑިވްސް (ބީއެމްއެލް) ސްކޮލަޝިޕްގެ ދަށުން ޖެމެއިކާގައި ތަމްރީނު ހަދަމުން އަންނަ ރޫޔާ ވަނީ މިދިޔަ އޭޕްރީލް މަހު 100 މީޓަރު ދުވުމުގެ ޖޫނިއަރ ރިކޯޑުވެސް މުގުރާލާފައެވެ. ރޫޔާ އެ ރިކޯޑު ހަދާފައިވަނީ ޖެމެއިކާގެ ކިންގްސްޓަންގައި ކުރިއަށްދިޔަ "ވެލޯސިޓީ ފެސްޓް" މުބާރާތުގައި 12.21 ސިކުންތުން ރޭސް ނިންމައިގެންނެވެ.