ގަލޮޅު ރަސްމީ ފުޓްބޯޅަ ދަނޑުގެ ލައިޓިން ސިސްޓަމް މަރާމާތުކުރުމުގެ އަމަލީ މަސައްކަތް ފަށައިފިއެވެ.
ސިފައިންގެ ވެލްފެއާ ޕްރައިވެޓް ލިމިޓެޑް (ސިވެކް) އާ ހަވާލުކޮށްގެން ކުރިއަށްގެންދާ މި މަސައްކަތަކީ ގާތް ގަނޑަކަށް ހަތަރު މިލިޔަން ރުފިޔާގެ މަސައްކަތެކެވެ. މި އެއްބަސްވުމުގެ ތެރެއިން ކުރުމަށް ހަމަޖެހިފައިވާ ކަންތައްތަކުގެ ތެރޭގައި ލައިޓުތަކުގެ މިހާރުގެ ހާލަތު ބެލުމަށްފަހު، ބަދަލުކުރަން ޖެހޭ ލައިޓުތައް ބަދަލުކުރުމާއި، މުޅި ލައިޓް ސިސްޓަމްގެ ވަޔަރިން ބަދަލުކުރުމުގެ އިތުރުން ލައިޓިން ސިސްޓަމްގެ އެހެނިހެން މަރާމާތުތައް ކަންކަން ހިމެނެއެވެ.
ދަނޑުގެ ލައިޓިން މަރާމާތުކުރުމުގެ މަސައްކަތުގައި ފުރަތަމަ ކުރިއަށްގެންދިޔައީ ލައިޓުތަކަށް ލިބިފައިވާ ގެއްލުންތައް ބަލައި، އެކަންތައްތައް ދެނެގަތުމުގެ މަސައްކަތެވެ. އޭގެ ފަހުން މިހާރު ވަނީ ލައިޓުތައް މަރާމާތުކުރުމުގެ އަމަލީ މަސައްކަތް ފަށާފައެވެ.
މިދިޔަ ފަސް އަހަރަށް ބަލާއިރު، ގަލޮޅު ދަނޑުގެ ލައިޓުތަކުގެ މައްސަލަ ޖެހި ފުޓްބޯޅަ ސީޒަންގެ މެޗުތައް ކުރިއަށްގެންދިއުމަށް ދަތިތައް ދިމާވިއެވެ. އަދި އެންމެ ފަހުން މިދިޔަ އޯގަސްޓް މަހު ދަނޑުގެ ލައިޓުތައް ވަރަށް ބޮޑަށް މައްސަލަ ޖެހި ބޭނުން ނުކުރެވޭވަރު ވަނީ ވެފައެވެ.
އެހެންވެ އެންމެ ފަހުން މިދިޔަ ޑިސެމްބަރު މަހު ބޭއްވި ދެވަނަ ޑިވިޝަން ފުޓްބޯޅަ މުބާރާތުގެ މެޗުތައްވެސް ކުޅެން ޖެހުނީ ހަވީރެވެ. ރޭގަނޑު މެޗުތައް ނުކުޅެވުމުގެ ސަބަބުން މުބާރާތުގެ މެޗުތައް ދޮޅު މަހަށްވުރެ ދިގުލައިގެންދިޔައެވެ.
ސިފައިންގެ ވެލްފެއާ ޕްރައިވެޓް ލިމިޓެޑް (ސިވެކް) އިން ކުރަމުން އަންނަ ލައިޓުތައް މަރާމާތުކުރުމުގެ މަސައްކަތް އަންނަ މަހުގެ ކުރީކޮޅު ނިންމާލެވެނޭ ކަމަށް ކުޅިވަރާއި ހަށިހެޔޮކަމާ ބެހޭ ވުޒާރާއިން މައުލޫމާތުދެއެވެ.
ރޭގަނޑު މެޗުތައް ކުޅެވޭނެ އިންތިޒާމުތައް ހަމަޖެއްސުމުގެ ގޮތުން މިހާރު ބޭނުންކުރަމުން އަންނަ ލައިޓިން ސިސްޓަމް ގަލޮޅު ދަނޑުގައި ބޭނުންކުރަން ފެށީ 2004 ވަނަ އަހަރެވެ. އޭގެ ފަހުން ލައިޓުތަކުގެ ބޮޑު މަރާމާތެއް ކޮށްފައިވަނީ 2010 ވަނަ އަހަރުގައެވެ. އެންމެ ފަހުން ގަލޮޅު ދަނޑުގެ ލައިޓިން ސިސްޓަމް މަރާމާތުކޮށްފައިވަނީ ރާއްޖޭގައި 2021 ވަނަ އަހަރު ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތަށެވެ.