އެތުލެޓިކްސް އެސޯސިއޭޝަން އޮފް މޯލްޑިވްސްގެ ރައީސްކަމަށް އިންތިޚާބުވެވަޑައިގަތުމާއެކު، ހާމަވެގެންދިޔައީ އެ އެސޯސިއޭޝަނުގައި އުޅުނު 12 ވަރަކަށް އަހަރުގެ ތެރޭގައި އޭނާގެ މަސައްކަތް މީހުން ބަލައިގަނެފައިވާކަން ކަމަށް އައު ރައީސް މުސްޠަފާ މުޙައްމަދު (މުސްތޮ) ވިދާޅުވެއްޖެއެވެ.
އެސޯސިއޭޝަނުގެ އަހަރީ އާންމު ޖަލްސާގައި އެކި މަގާމުތަކާއި، ހިންގާ ކޮމިޓީގެ މެންބަރުންގެ މެދުގައި ނެގީ ފެންނަ ނުފެންނަ ވޯޓެކެވެ. އެއީ އެ މަގާމުތަކަށް އިތުރު މީހަކު ކުރިމަތިލާފައި ނެތުމުންނެވެ. މުސްޠަފާ އިންތިޚާބުވެވަޑައިގަތީ ސައްތައިން ސައްތަ ތާއީދާއެކުއެވެ.
އެތުލެޓިކްސް އެސޯސިއޭޝަންގެ ރައީސްކަން މިދިޔަ 12 ވަރަކަށް އަހަރު ފުރުއްވީ، މިހާރުގެ ކޮމިޝަނަރ އޮފް ސްޕޯޓްސް މުޙައްމަދު ޠަލާލެވެ. ކޮމިޝަނަރުގެ މަގާމަށް އައްޔަނުކުރެއްވުމާއެކު، ޠަލާލް ވަނީ އެތުލެޓިކްސް ރައީސްގެ މަގާމުން އިސްތިއުފާދެއްވާފައެވެ. އޭގެ ފަހުން އެ އެސޯސިއޭޝަނުގެ ރައީސަކަށް އިންތިޚާބުވެވަޑައިގަތީ މުސްޠަފާއެވެ.
"ޕީއެސްއެމް ސްޕޯޓްސް" އާ ވާހަކަދައްކަވަމުން މުސްޠަފާ ވިދާޅުވީ އެތުލެޓިކްސްގައި އުޅެވުނު ދުވަސްތަކުގެ ތެރޭގައި ފާހަގަވާ ކަމަކީ، އިންޑިވިޖުއަލް މީހަކަށް ވުރެ ބޮޑަށް ޓީމެއްގެ ގޮތުގައި ކުރެވޭ މަސައްކަތް ކަމަށެވެ. އެގޮތުން މުބާރާތެއް ބޭއްވިޔަސް، ޓްރެއިން ކުރިޔަސް، ކުރިއަށް އޮތްތަނުގައިވެސް އެ ޓީމު ބްރޭކުނުކޮށް އިތުރަށް ވަރުގަަދަ ކުރެވޭތޯ މަސައްކަތްކުރައްވާނެ ކަމަށް މުސްޠަފާ ވިދާޅުވިއެވެ.
އޭނާ ވިދާޅުވީ އެތުލެޓިކްސް އެސޯސިއޭޝަންގެ ހިންގާ ކޮމިޓީގައި އުޅެނީ ވަރަށް އެކުވެރިކޮށް އުޅޭ ފަރާތްތަކެއް ކަމަށާއި، އޭގެ ފައިދާވެސް އެބައޮތް ކަމަށެވެ. ކޮންމެ ޓާގެޓެއް ހާސިލުކުރަންވެސް އެންމެން އެއްކޮށް މަސައްކަތްކުރާނެ ކަމަށާއި، ކަންކަން ހާސިލުކުރަން ބަލާއިރު އެ ޔަގީންކަން އެބައޮތް ކަމަށެވެ. އަދި ރައީސްކަމަށް ކުރިމަތިލި އެއް ސަބަބަކީވެސް ހަގީގަތުގައި ޓީމެއްގެ ގޮތުގައި މަސައްކަތް ކުރާތީ ކަމަށްވެސް ވިދާޅުވިއެވެ.