ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ބޭއްވި 50 އޯވަރުގެ ގައުމީ ކްރިކެޓް މުބާރާތުގެ ޗެމްޕިއަންކަން މާލޭ ވެޓެރަންސްއިން ހޯދައިފިއެވެ.
ކުޅިވަރު އެކުވެނީގެ ކްރިކެޓް ދަނޑުގައި މިއަދު ކުޅުނު ފައިނަލް މެޗުން މާލޭ ވެޓެރަންސް މޮޅުވީ މިލާން ކްރިކެޓް އެކެޑަމީއާ ވާދަކޮށް ތިން ވިކެޓުންނެވެ.
މި މެޗުގެ ގުރު ދިމާވުމުން މިލާން އެންމެ ފުރަތަމަ ކުޅެން އަރައި 33.3 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ 174 ލަނޑެވެ. އެ ޓީމުން އެންމެ ރަނގަޅަށް ކުޅުނީ 57 ބޯޅައިން ހާފް ސެންޗަރީއެއް ހެދި އިބްރާހީމް ނަޝާތާއި، 16 ބޯޅައިން 26 ލަނޑު އެއްކުރި ލީމް ޝަފީގެވެ. މި އިނިންގްސްގައި މާލޭ ވެޓެރަންސްގެ ނަވީން ޕެރޭރާ އާއި ނަދަރާޖް ހަރީރާޖް ވަނީ ކޮންމެ އުކުންތެރިއަކު ތިން ވިކެޓް ނަގާފައެވެ.
ޖަވާބުގައި މާލޭ ވެޓެރަންސް ކުޅެން އަރައި 39.1 އޯވަރުގެ ތެރޭގައި ވަނީ ހަތް ކުޅުންތެރިން ނުބައިވެގެން 175 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅެފައިވަނީ 67 ބޯޅައިން 46 ލަނޑު ހެދި ސަމިތަ ފެނާންޑޯ އާއި، 39 ބޯޅައިން 33 ލަނޑު އެއްކުރި އަސްކަރު ހުސެއިނެވެ. މި އިނިންގްސްގައި މިލާންގެ އިބްރާހީމް ނަޝާތު ވަނީ ތިން ވިކެޓް ނަގާފައެވެ.
ފައިނަލް މެޗުގައި މާލޭ ވެޓެރަންސްއިން މިލާން ބަލިކުރިއިރު، މި މުބާރާތުގެ ގްރޫޕް ސްޓޭޖުގައި މިލާނުން ވަނީ މާލޭ ވެޓެރަންސްގެ މައްޗަށް ކުރި ހޯދާފައެވެ. އަދި މި މުބާރާތުގެ ފައިނަލަށް މިލާން ދަތުރުކުރީ ލީގު ބުރުގައި ކުޅުނު ހަތަރު މެޗުވެސް ކާމިޔާބުކޮށްގެންނެވެ.
މި ފަހަރުގެ 50 އޯވަރުގެ ގައުމީ ކްރިކެޓް މުބާރާތުގައި ފަސް ޓީމެއް ވަނީ ވާދަކޮށްފައެވެ. އެއީ މާލޭ ވެޓެރަންސް އާއި މިލާންގެ އިތުރުން ސީބީއެލް ސްޕޯޓްސް އާއި، ނިއު ސްޓަރ އަދި ފުވައްމުލައް ކްރިކެޓް އެކެޑަމީއެވެ.