ފެތުމުގެ ގައުމީ ރިކޯޑުތަކެއް މުޙައްމަދު ރިހާން ޝިހާމް އާއި މުޙައްމަދު އާން ހުސެއިން އައުކޮށްފިއެވެ.
މި ދެ ފެތުންތެރިން ގައުމީ ރިކޯޑުތައް ހަދާފައިވަނީ މެލޭޝިއާގައި މިހާރު ކުރިއަށްދާ 66 ވަނަ މެލޭޝިއާ އޯޕަން ސްވިމިން ޗެމްޕިއަންޝިޕްސް 2024 ގައެވެ.
އެގޮތުން ރިހާން ވަނީ މިހާތަނަށް ހަތަރު ރިކޯޑެއް ހަދާފައެވެ. އެއީ ފިރިހެނުންގެ ލޯންގްކޯސް 1500 މީޓަރު ފްރީސްޓައިލް އިވެންޓުގެ ގައުމީ ރިކޯޑާއި، ފިރިހެނުންގެ ލޯންގްކޯސް 200 މީޓަރު އިންޑިވިޖުއަލް މެޑްލޭ އިވެންޓުގެ ގައުމީ ރިކޯޑުގެ އިތުރުން ފިރިހެނުންގެ ލޯންގްކޯސް 100 މީޓަރ ބަޓަރފްލައި އިވެންޓުގެ ގައުމީ ރިކޯޑެވެ. މީގެ ތެރެއިން 100 މީޓަރު ބަޓަރފްލައި އިވެންޓުުގެ ރިކޯޑް ރިހާން ވަނީ މި މުބާރާތުގައި ދެ ފަހަރެއްގެ މަތިން އައުކޮށްފައެވެ.
ފިރިހެނުންގެ ލޯންގްކޯސް 1500 މީޓަރު ފްރީސްޓައިލް އިވެންޓުގެ ގައުމީ ރިކޯޑު ރިހާން ހެދީ 18 މިނެޓު 3.57 ސިކުންތުން ރޭސް ފުރިހަމަކޮށްގެންނެވެ. މި ރިކޯޑު މީގެ ކުރިން އޮތީ މުބާލް އައްޒާމް އިބްރާހީމްގެ އަތުގައެވެ. އެއީ 2018 ވަނަ އަހަރު ބޭއްވި 18 ވަނަ އޭޝިއަން ގޭމްސްގައި 19 މިނެޓު 26.54 ސިކުންތުން ރޭސް ނިންމައިގެންނެވެ.
މީގެ އިތުރުން ފިރިހެނުންގެ ލޯންގްކޯސް 100 މީޓަރު ބަޓަރފްލައި އިވެންޓުގެ ގައުމީ ރިކޯޑު ރިހާން އެންމެ ފުރަތަމަ އައުކުރީ އެއް މިނެޓު 0.73 ސިކުންތުން ރޭސް ފުރިހަމަކޮށްގެންނެވެ. އެއާއެކު މި އިވެންޓުގެ ފައިނަލް ސީއަށް ރިހާން ދަތުުރުކުރިއިރު، ފައިނަލް ސީގައި އޭނާ ވަނީ އެއް މިނެޓު 0.14 ސިކުންތުން ރޭސް ނިންމައި، އަނެއްކާވެސް ރިކޯޑު އައުކޮށްފައެވެ. މި މުބާރާތުގެ ކުރިން ރިހާން މި އިވެންޓުގެ ގައިމީ ރިކޯޑު ހަދާފައިވަނީ މި އަހަރުގެ ކުރީކޮޅު ބޭއްވި 11 ވަނަ އޭޝިއަން އޭޖް ގްރޫޕް ޗެމްޕިއަންޝިޕްސްގައެވެ. އެއީ އެއް މިނެޓު 1.60 ސިކުންތުން ރޭސް ނިންމައިގެންނެވެ.
މި މުބާރާތުގައި ފިރިހެނުންގެ ލޯންގްކޯސް 200 މީޓަރު އިންޑިވިޖުއަލް މެޑްލޭ އިވެންޓުގެ ގައުމީ ރިކޯޑު ރިހާން އައުކުރީ ދެ މިނެޓު 22.07 ސިކުންތުން ރޭސް ފުރިހަމަކޮށްގެންނެވެ. މިއާއެކު ރިހާން ވަނީ މި އިވެންޓުން ފައިނަލް ސީއަށްވެސް ދަތުރުކޮށްފައެވެ. 200 މީޓަރު އިންޑިވިޖުއަލް މެޑްލޭ އިވެންޓުގެ ގައުމީ ރިކޯޑު އެންމެ ފަހުން އައުކޮށްފައިވަނީ 2022 ވަނަ އަހަރު ބޭއްވި ކޮމަންވެލްތު ގޭމްސްގައި މުބާލްއެވެ. އެ ފަހަރު މުބާލް ރޭސް ނިންމާފައިވަނީ ދެ މިނެޓު 23.69 ސިކުންތުންނެވެ.
މީގެ އިތުރުން އާން ވަނީ މިހާތަނަށް މި މުބާރާތުގައި ދެ ރިކޯޑެއް ގާއިމުކޮށްފައެވެ. އެގޮތުން ފިރިހެނުންގެ ލޯންގްކޯސް 100 މީޓަރު ފްރީސްޓައިލް އިވެންޓުގެ ގައުމީ ރިކޯޑު އާން އައުކުރީ 54.46 ސިކުންތުން ރޭސް ފުރިހަމަކޮށްގެންނެވެ. އާން ވަނީ މި އިވެންޓުން ފައިނަލް ސީއަށްވެސް ދަތުރުކޮށްފައެވެ. ފައިނަލްގައި އާންގެ ޓައިމިންއަކީ 54.75 ސިކުންތެވެ. މި ރިކޯޑު މީގެ ކުރިންވެސް އޮތީ އާންގެ އަތުގައެވެ. އެއީ މި އަހަރުގެ ކުރީކޮޅު ބޭއްވި އޭޝިއަން އޭޖް ގްރޫޕް ޗެމްޕިއަންޝިޕްސްގައި 55.11 ސިކުންތުން ރޭސް ނިންމައިގެންނެވެ.
އަދި ފިރިހެނުންގެ ލޯންގްކޯސް 50 މީޓަރު ފްރީސްޓައިލް އިވެންޓުގެ ގައުމީ ރިކޯޑު އާން އައުކޮށްފައިވަނީ 24.28 ސިކުންތުން ރޭސް ފުރިހަމަކޮށްގެންނެވެ. މިއާއެކު އާން ވަނީ މި އިވެންޓުން ފައިނަލް ބީއަށްވެސް ދަތުރުކޮށްފައެވެ. 50 މީޓަރު ފްރީސްޓައިލް އިވެންޓުގެ ގައުމީ ރިކޯޑު މީގެ ކުރިންވެސް އޮތީ އާންގެ އަތުގައެވެ. އެއީ 2022 ވަނަ އަހަރުގެ ކޮމަންވެލްތު ގޭމްސްގައި 24.34 ސިކުންތުން ރޭސް ފުރިހަމަކޮށްގެންނެވެ.