ސުޕަރ ސެޕްޝަލިސްޓު ޑޮކްޓަރުންނާއި، ސްޕެޝަލިސްޓު ޑޮކްޓަރުން އަތޮޅުތަކަށް ފޮނުއްވުމުގެ ދެވަނަ ޕްރޮގްރާމްގެ ދަށުން، މިހާތަނަށް 4,000 އަށް ވުރެ ގިނަ ބަލިމީހުން، ޑޮކްޓަރަށް ދައްކާފައިވާ ކަމަށް އާސަންދަ ކުންފުނިން ހާމަކޮށްފިއެވެ.
އެ ކުންފުނިން ހާމަކުރާ ގޮތުގައި، ސުޕަރ ސެޕްޝަލިސްޓުންނާއި، ސްޕެޝަލިސްޓުން އަތޮޅުތަކަށް ފޮނުވައިގެން ކުރިޔަށް ގެންދާ މި ޕްރޮގްރާމްގެ ދެވަނަ ބުރުގައި މިހާތަނަށް 14 އަތޮޅަކަށް ޑޮކްޓަރުން ޒިޔާރަތްކޮށް، 4،449 ބަލިމީހުން ބައްލާފައިވެއެވެ. ޕީއެސްއެމް ނިއުސްއަށް މަޢުލޫމާތު ދެއްވަމުން އާސަންދަ ކުންފުނީގެ ޑެޕިއުޓީ މެނޭޖަރ ޢާއިޝަތު ޒަމީރާ ވިދާޅުވީ، މި ޕްރޮގްރާމްގެ ތެރެއިން އެންމެ ގިނަ މީހުން ޑޮކްޓަރަށް ދައްކާފައިވަނީ ކަރުމަންތީގަޔާއި، ކަށީގެ އިތުރުން ނާރުގެ ބަލިތަކުގެ ޑޮކްޓަރުންނަށް ކަމަށެވެ. ޑޮކްޓަރަށް ދެއްކި މީހުންގެ ތެރެއިން 397 މީހުން ރާއްޖެއިން ބޭރަށް ފަރުވާ ހޯދުމަށް ޑޮކްޓަރު ލަފާ ދެއްވާފައިވާ ކަމަށް ޒަމީރާ ވިދާޅުވިއެވެ. މި ޕްރޮގްރާމްގެ ތެރެއިން މިހާތަނަށް ރާއްޖެއިން ބޭރުން 59 ޑޮކްޓަރަކު ރާއްޖެއަށް ޒިޔާރަތްކޮށް ބަލިމީހުން ބަލާފައިވެއެވެ.
ރާއްޖޭގައި މިހާރު ލިބެން ނެތް ސުޕަރ ސްޕެޝަލިސްޓް ޑޮކްޓަރުން އަތޮޅުތަކަށް ފޮނުއްވުމުގެ ފުރަތަމަ ޕްރޮގްރާމް މިދިޔަ އަހަރު ނިމުނުއިރު، 6،000 އަށް ވުރެ ގިނަ ބަލިމީހުން ބައްލާފައިވެއެވެ. މި ޕްރޮގްރާމްގެ ތެރެއިން ދިވެހިންގެ ތެރޭގައި މައިބަދައިގެ މައްސަލަތަކާއި ކަރުންމަތީގެ ބަލިތަކަށް ދައްކާ ބަލިމީހުންގެ އަދަދު ގިނަކަމަށް ފާހަގަކުރިފައިވާ ކަމަށް އާސަންދަ ކުންފުނިން ހާމަކުރެއެވެ. މި ޕްރޮގްރާމްގެ ފުރަތަމަ ބުރުގައި 83 ޑޮކްޓަރުން ރާއްޖެއަށް ޒިޔާރަތް ކުރައްވާފައިވެއެވެ. އަދި ތަފާތު 18 ދާއިރާއަކުން ޑޮކްޓަރުން ގެނެސްފައިވާއިރު، އޭގެތެރޭގައި ކިޑްނީގެ ބަލުތަކާއި، ކެންސަރާއި، ލޭގެ ބަލިތަކާއި ހިތުގެ ބަލިތަކަށް ޚާއްޞަ ޑޮކްޓަރުން ހިމެނިވަޑައިގެންނެވިއެވެ.