އިނގިރޭސި ކުލަބު ވެސްޓް ހޭމް ޔުނައިޓެޑުގެ އައު ކޯޗަކަށް ކުރިން ވުލްވްސްގެ ކޯޗަކަށް ހުރި ހުލެން ލޮޕެޓެގީ ހަމަޖައްސައިފިއެވެ.
ވެސްޓް ހޭމުން އައު ކޯޗަކަށް ފާރަލާން ފެށީ އެ ޓީމުގެ ކޯޗުކަމުގައި ހުރި ޑޭވިޑް މޮއެސް، މި ސީޒަން ނިމުމުން އެ ޓީމު ދޫކޮށްލުމުންނެވެ. އެހާ ހިސާބުން ފެށިގެން ވެސްޓް ހޭމުން ދިޔައީ ލޮޕެޓެގީއަށް ފާރަލަމުންނެވެ.
މީގެ ކުރިން ރެއާލް މެޑްރިޑަށްވެސް ކޯޗުކަންކޮށްދިން ލޮޕެޓެގީ ވަނީ ޕޯޓޯއަށްވެސް ކޯޗުކަންކޮށްދީފައެވެ. އަދި ސްޕެއިންގެ ގައުމީ ޓީމުގެ ހެޑް ކޯޗުކަމުގައިވެސް އޭނާ ވަނީ 2018 ވަނަ އަހަރު މަސައްކަތްކޮށްފައެވެ.
މީޑިއާ ރިޕޯޓުތައް ބުނާގޮތުން އުމުރުން 57 އަހަރުގެ ލޮޕެޓެގީ ވެސްޓް ހޭމާ ގުޅުމަށް ނިންމީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އަދި ވެސްޓް ހޭމްގެ ކޯޗުކަމާ އޭނާ ރަސްމީކޮށް ހަވާލުވާނީ ޖުލައި މަހުގެ އެއްވަނަ ދުވަހުން ފެށިގެންނެވެ.
ލޮޕެޓެގީގެ ކޯޗިން ކެރިއަރުގައި އެންމެ ކާމިޔާބު ކުލަބަކީ ސްޕެއިންގެ ސެވިއްޔާއެވެ. އެ ޓީމުގެ ކޯޗުގައި ލޮޕެޓެގީ ތިން އަހަރު މަސައްކަތްކުރިއެވެ. އެ ކުލަބުގައި އޭނާ ވަނީ 2020 ވަނަ އަހަރުގެ ޔުއެފާ ޔޫރޮޕާ ލީގުގެ ތަށި ކާމިޔާބުކޮށްފައެވެ. އަދި 2023 ވަނަ އަހަރު ވުލްވްސްއާ ހަވާލުވެ އޭނާ ވަނީ އެ ކުލަބު ރެލިގޭޝަނުން ސަލާމަތްކޮށްދީފައެވެ.
އިނގިރޭސި މީޑިއާތަކާ ވާހަކަދައްކަމުން ވެސްޓް ހޭމްގެ ޓެކްނިކަލް ޑިރެކްޓަރު ޓިމް ސްޓައިޓެން ބުނީ ލޮޕެޓެގީއަކީ މޮއެސްގެ ފަހުން އެ ޓީމުން އެންމެ ބޮޑަށް ފާރަލި ކޯޗު ކަމަށާއި، ލޮޕެޓެގީ އަކީ ކުޅުންތެރިންނާ ގުޅުން ރަނގަޅުވާނެ ކޯޗެއް ކަމަށެވެ. އަދި އެކަން ރަނގަޅުކޮށްދެވޭނެ ކަމަށްވެސް އޭނާ ބުންޏެވެ.
އެންމެ ފަހުން ނިމުނު ލީގުގައި ވެސްޓް ހޭމް އޮތީ ތާވަލުގެ ނުވަވަނައިގައެވެ. އެ ޓީމު ވަނީ ޔޫރޮޕާ ލީގުގެ ކުއާޓާ ފައިނަލުގައި ބަޔާ ލެވަކޫސަން އަތުން ބަލިވެފައެވެ.