ނެޓްބޯލް އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ބޭއްވި 21 ވަނަ ގައުމީ ނެޓްބޯޅަ މުބާރާތުގެ ފުރަތަމަ ޑިވިޝަނުގެ ޗެމްޕިއަންކަން ކުލަބު މެޓްރިކްސްއިން ހޯދައިފިއެވެ.
މި މުބާރާތުގެ ޗެމްޕިއަންކަން ކުލަބު މެޓްރިކްސް ހޯދީ ފައިނަލް މެޗުގައި ކުލަބު ގްރީން ސްޓްރީޓްސްއާ ވާދަކޮށް ވާދަވެރި އަދި ފޯރިގަދަ ކުޅުމަކަށްފަހު 57-46 ޕޮއިންޓުން މެޗު ކާމިޔާބުކޮށްގެންނެވެ.
ޖުމްލަ ފަސް ޓީމާއެކު ކުރިއަށްދިޔަ މި މުބާރާތުގެ ފައިނަލް މެޗަށްފަހު ފުރަތަމަ ޑިވިޝަނުގެ އެންމެ މޮޅު ހަތް ކުޅުންތެރިން ވަނީ ހޮވާފައެވެ. މި ހަތް ކުޅުންތެރިންގެ ތެރެއިން ފަސް ކުޅުންތެރިން ނިސްބަތްވަނީ ޗެމްޕިއަންކަން ހޯދި ކުލަބު މެޓްރިކްސްއަށެވެ. އެއީ އާމިނަތު ރަބާބު އިބްރާހީމް، އީމާ އަބްދުލް ސައްތާރު، ހަމްނާ އަބްދުލް ރަހުމާން، މަރިޔަމް ޝިނާތު އަދި އެ ޓީމުގެ ބިދޭސީ ކުޅުންތެރިޔާ ޗަތުރަންގީ ޝަނިކާއެވެ.
ދެން ހިމެނެނީ ކުލަބު ގްރީން ސްޓްރީޓްސްގެ ދެ ކުޅުންތެރިންނެވެ. އެއީ އައިޝަތު ރީމާ އާއި އެ ޓީމުގެ ބިދޭސީ ކުޅުންތެރިޔާ އެސެޓާ މޭރީއެވެ.
މުބާރާތުގެ އެންމެ އުއްމީދީ ކުޅުންތެރިއަކީ ކުޅުދުއްފުށީ ޔޫތު އެންޑް ރެކްރިއޭޝަން ކުލަބުގެ މިޝްކާ އަފްރާހް ހަސަނެވެ. އަދި ކުއީން އޮފް ދަ ސީރީޒްއަށް ހޮވުނީ ކުލަބު މެޓްރިކްސްގެ އީމާ އަބްދުލް ސައްތާރެވެ.