އިންޑިއަން ޕްރިމިއަރ ލީގު (އައިޕީއެލް) ގެ ޕްލޭއޮފް އެލިމިނޭޓާ މެޗުގައި ހަތަރު ވިކެޓުން ރޯޔަލް ޗެލެންޖާސް ބެންގަލޫރު އަތުން މޮޅުވެ، ރާޖަސްތާން ރޯޔަލްސްއިން ފައިނަލުގެ އުންމީދު އައުކޮށްފިއެވެ.
މުބާރާތުގެ ފައިނަލުގައި އެއްކޮޅުން ބައްދަލުކުރަނީ ކަލްކަތާ ނައިޓް ރައިޑާސްއެވެ. އެ ޓީމާއެކު ފައިނަލުގައި ކުޅޭނެ ޓީމެއް އެނގޭނީ ހުކުރު ދުވަހުގެރޭ ސަންރައިޒާސް ހައިދަރުއާބާދާއި ރާޖަސްތާން ކުޅޭ ކޮލިފަޔާ މެޗުންނެވެ.
ރާޖަސްތާން ވަނީ މި މެޗުގެ ކުރިން ކުޅުނު ހަތަރު މެޗުންވެސް ބަލިވެފައެވެ. ނަމަވެސް އެންމެ ފަހުން ކުޅުނު ހަ މެޗުންވެސް މޮޅުވެފައިވާ ބެންގަލޫރު އަތުން ހޯދި މި މޮޅާއެކު އެ ޓީމަށް ވަނީ އިތުރު ހިތްވަރެއް ލިބިފައެވެ.
ރާޖަސްތާނުން ވަނީ ރޭ ގުރު ދިމާވުމުން ހޮވަން އަރާފައެވެ. ހޮވަން އަރައު އެ ޓީމުން ވަނީ ޓީމެއްގެ ސިފައިގައި މޮޅު ކުޅުމެއް ދައްކާފައެވެ. ބެންގަލޫރުން ކުޅެން އަރައި 20 އޯވަރުގެ ތެރޭގައި އަށް ކުޅުންތެރިން ނުބައިވެގެން ހެދުނީ 172 ލަނޑެވެ. އެ ޓީމުން އެންމެ ރަނގަޅަށް ކުޅުނީ 33 ލަނޑު ހެދި ވިރާޓް ކޯލީ އާއި 34 ލަނޑު ހެދި ރަޖަތު ޕަތީދާރުގެ އިތުރުން 32 ލަނޑު ހެދި މަހިޕާލް ލޮމްރޯރެވެ.
ޖަވާބުގައި ކުޅެން އަރައި ރާޖަސްތާނުން ވަނީ ބާކީ ހަ ބޯޅަ އޮއްވައި ހަ ކުޅުންތެރިން ނުބައިވެގެން 174 ލަނޑާއެކު މެޗުން މޮޅުވެފައެވެ. ރާޖަސްތާން ޓީމަށް މި މެޗުގައި އެންމެ ރަނގަޅު ކުޅުމެއް ދެއްކީ 45 ލަނޑު ހެދި ޔަޝަޝްވީ ޖައިސްވާލް އާއި، 36 ލަނޑު ހެދި ރިހާން ޕަރާގެވެ. ބެންގަލޫރުން އެންމެ ރަނގަޅު ކުޅުމެއް ދެއްކީ ދެ ވިކެޓް ނެގި މުޙައްމަދު ސިރާޖެވެ.
އެންމެ ފުރަތަމަ 2008 ވަނަ އަހަރު ބޭއްވި އައިޕީއެލްގެ ޗެމްޕިއަންކަން ހޯދާފައިވަނީ ރާޖަސްތާނުންނެވެ. އެއަށްފަހު 2022 ގެ ފައިނަލުގައި އެ ޓީމު ކުޅެފައިވެއެވެ. ފައިނަލުގައި ބަލިވީ ގުޖުރާތު ޓައިޓަންސް އަތުންނެވެ.