މި އަހަރު ޖަރުމަނުގައި ބާއްވާ ޔޫރޯ ފުޓްބޯޅަ މުބާރާތަށްފަހު ޕްރޮފެޝަނަލް ފުޓްބޯޅަ ކުޅުން ހުއްޓާލަން ޓޯނީ ކްރޫސް ނިންމައިފިއެވެ.
ޖަރުމަން ގައުމީ ޓީމާއި އެ ގައުމުގެ ކުލަބުތަކުގައި ކްރޫސް ވަނީ ގިނަ ކާމިޔާބީތަކެއް ހޯދާފައެވެ. އޭނާ ވަނީ ޖަރުމަނުގެ ބަޔާން މިއުނިކާއި ދާދިފަހުން ބޮޑެތި ކާމިޔާބީތަކެއް ހޯދި ބަޔާން ލެވަކޫސަނަށްވެސް ކުޅެފައެވެ.
ކްރޫސްގެ ފުޓްބޯޅަ ކެރިއަރުގައި އެންމެ ބޮޑެތި ކާމިޔާބީތަކެއް ހޯދީ ރެއާލް މެޑްރިޑުގައެވެ. އުމުރުން މިހާރު 34 އަހަރު ވެފައިވާ ކްރޫސް ވަނީ 2014 ވަނަ އަހަރު ރެއާލަށް ބަދަލުވުމަށްފަހު ހަތަރު ފަހަރަށް ސްޕެނިޝް ލީގާއި، ޔުއެފާ ޗެމްޕިއަންސް ލީގު ކާމިޔާބުކޮށްފައެވެ. މީގެ އިތުރުން އޭނާ ވަނީ ޖަރުމަނާއެކު 2014 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި ޓީމުގައި މުހިންމު ދައުރެއް އަދާކޮށްފައެވެ.
މީގެ ކުރިން 2021 ވަނަ އަހަރު ކްރޫސް ވަނީ ގައުމީ ޓީމަށް ކުޅުން ހުއްޓާލާފައެވެ. ނަމަވެސް އެ ޓީމުގެ މިހާރުގެ ކޯޗުގެ އެދުމުގެ މަތިން މި އަހަރުގެ ފެބްރުއަރީ މަހުގެ ތެރޭގައި އޭނާ ވަނީ އެނބުރި ޓީމާ ގުޅިފައެވެ. ބެލެވޭ ގޮތުގައި މިއީ ޖަރުމަނުގައި ބާއްވާ ޔޫރޯ މުބާރާތްކަމުން، ފަހު މުބާރާތަކަށް މި މުބާރާތް ހެދުމެވެ.
ރެއާލް މެޑްރިޑަކީ އޭނާގެ ފަހު ޓީމު ކަމަށް ތަކުރާރުކޮށް ފާހަގަކޮށްފައިވެއެވެ. އަދި 10 އަހަރަށްފަހު، ރެއާލް މެޑްރިޑުން ވަކިވާއިރު، އެ ޓީމާއެކު ހޭދަކުރި ކާމިޔާބު ދުވަސްތައް ދުވަހަކުވެސް ހަނދާން ނުނެތޭނެ ކަމަށް ކްރޫސް ވަނީ މީޑިއާތަކުގައި ބުނެފައެވެ.
ރެއާލް މެޑްރިޑާއެކު ކްރޫސްއަށް ދެން އޮތީ ޗެމްޕިއަންސް ލީގު ފައިނަލް މެޗެވެ. ބޮރޫޝިއާ ޑޯޓްމުންޑާ ދެކޮޅަށް މި މެޗު ކުޅުމަށް ހަމަޖެހިފައިވަނީ އަންނަ މަހުގެ އެއްވަނަ ދުވަހުއެވެ. މި މެޗު ކުޅޭނީ ވެމްބްލީ ސްޓޭޑިއަމުގައެވެ.