މެލޭޝިއާގެ އިޕޯ ސިޓީގައި ބޭއްވި 20 ވަނަ އޮކިނަވާ ގޮޖު-ރިޔު އިޕޯ ސިޓީ އޯޕަން ކަރަޓޭ ޗެމްޕިއަންޝިޕް 2024 ގައި ވާދަކުރި ރާއްޖޭގެ ޓީމުން 9 ރަން މެޑަލް ހޯދައިފިއެވެ.
މެލޭޝިއާގެ އިޕޯ ސިޓީގައި މެއި މަހުގެ 10 އިން 12 އަށް ބޭއްވި މި މުބާރާތުގައި ދިވެހިރާއްޖެއިން ބައިވެރިވި ޓީމުން ވަނީ 9 ރަން މެޑަލް، 9 ރިހި މެޑަލް އަދި 14 ލޯ މެޑަލް ހޯދާފައެވެ. މިއީ މި ޗެމްޕިއަންޝިޕުގައި ރާއްޖެއިން ބައިވެރިވި ފުރަތަމަ ފަހަރެވެ.
ރާއްޖެ ތަމްސީލުކުރި ޓީމަކީ 2022 ވަނަ އަހަރުގައި އިންޑިއާ އާއި ސްރީ ލަންކާގައި ބޭއްވި މިފަދަ މުބާރާތްތަކުންވެސް ގިނަ ކާމިޔާބީތަކެއް ހޯދާފައިވާ ޓީމެކެވެ. ރާއްޖޭގެ ޓީމު ތަމްސީލުކުރަނީ މޯލްޑިވްސް ކަރާޓޭ އެޝޯސިއޭޝަނުގެ ދަށުން ހިންގާ ޖަޕާން ޝޮޓޮކަން ކަރާޓޭ އެސޯސިއޭޝަނުގެ ރާއްޖޭގެ ގޮތްޕެވެ. މި ޓީމުގެ 15 ބައިވެރިންގެ ތެރޭގައި ޣިޔާސުއްދީން އިންޓަރނޭޝަނަލް ސްކޫލް، ފިންލަންޑް އިންޓަރނޭޝަނަލް ސްކޫލް މޯލްޑިވްސް، ހުރަވީ ސްކޫލް އަދި ޖަމާލުއްދީން ސްކޫލްގެ ދަރިވަރުން ހިމެނެއެވެ.
މި މުބާރާތުގެ އެކި އުމުރުފުރާތަކުގައި ރާއްޖެއިން ބައިވެރިވެފައިވަނީ ޓީމު ކަޓާ، ކަޓާ، ކުމިތޭ ކެޓަގަރީތަކުގައެވެ. މީގެ ތެރެއިން 10 އަހަރުން ދަށުގެ އަންހެން ޓީމު ވަނީ ޓީމު ކަޓާ ގައި ފަޚުރުވެރި ރަން މެޑަލް ހޯދާފައެވެ. މި މުބާރާތުގައި ރާއްޖެއާއެކު 10 ގައުމަކުން ވާދަކުރިއެވެ. އޭގެތެރޭގައި މެލޭޝިއާ، ސިންގަޕޫރު، އިންޑޮނޭޝިއާ، އިންޑިއާ، ނޭޕާލް، ޗައިނާ، އުޒްބެކިސްތާން، އީރާން އަދި ކެމްބޯޑިއާ ހިމެނެއެވެ.
މުބާރާތުގައި ވާދަކުރި ދިވެހި ޓީމު ތައްޔާރުކޮށްދެއްވީ ސެންސެއި ޕައްކީރު ރައްފާނީއެވެ.