އިންޑިއަން ޕްރިމިއަރ ލީގު (އައިޕީއެލް) ގެ ކޮލިފަޔާ މެޗުގައި ސަންރައިޒާސް ހައިދަރުއާބާދު އަށް ވިކެޓުން ބަލިކޮށް، ފައިނަލުގެ ފުރަތަމަ ޖާގަ ކަލްކަތާ ނައިޓް ރައިޑާސްއިން ހޯދައިފިއެވެ.
މިއީ އައިޕީއެލްގެ ފައިނަލަށް ކަލްކަތާ ދަތުރުކުރި ހަތަރުވަނަ ފަހަރެވެ. އެ ޓީމު ވަނީ މީގެކުރިން 2012 އާއި 2014 ވަނަ އަހަރު ބޭއްވި މުބާރާތުގެ ޗެމްޕިއަންކަންވެސް ހޯދާފައެވެ.
ނަރެންދުރަ މޯދީ ސްޓޭޑިއަމްގައި ރޭ ކުޅުނު މެޗުގެ ގުރު ދިމާވުމުން ހައިދަރުއާބާދު ޓީމު ޖެހުނީ ކުޅެން އަރާށެވެ. ނަމަވެސް އެ ޓީމު ކުޅެން އަރައި މާ ބޮޑު ތަފާތެއް ނުދެއްކުނެވެ. ހައިދަރުއާބާދުގެ ހުރިހާ ކުޅުންތެރިން ވަނީ 19.3 އޯވަރުގެ ތެރޭގައި ނުބައިވެފައެވެ. އެ ޓީމަށް ހެދުނީ 159 ލަނޑެވެ. އެންމެ ރަނގަޅު ކުޅުނީ 55 ލަނޑު ހެދި ރާހުލް ތުރިޕަތީ އާއި، 32 ލަނޑު ހެދި ހެއިންރިޗް ކްލާސެންއެވެ.
ކަލްކަތާއިން ވަނީ ޖަވާބުގައި ކުޅެން އަރައި 13.4 އޯވަރުގެ ތެރޭގައި ދެ ކުޅުންތެރިން ނުބައިވެގެން 164 ލަނޑު ހަދައި މެޗުން މޮޅުވެފައެވެ.
މެޗުން ބަލިވި ނަމަވެސް ކޮލިފަޔާ ދެވަނަ މެޗުން މޮޅުވެގެން ހައިދަރުއާބާދަށް އަދިވެސް ފުރުސަތު އެބައޮތެވެ. އެ މެޗުގައި ބައްދަލުކުރާ ޓީމެއް އެނގޭނީ ބުދަ ދުވަހު ކުޅޭ އެލިމިނޭޓާ މެޗުން މޮޅުވާ ޓީމަކާއެވެ. އެ މެޗުގައި ބައްދަލުކުރާނީ ރޯޔަލް ޗެލެންޖާސް ބެންގަލޫރާއި ރާޖަސްތާން ރޯޔަލްސްއެވެ.