ލިވަޕޫލްގެ އައު ކޯޗަކަށް ނެދަލަންޑްސްގެ އާނޭ ސްލޮޓް ހަމަޖައްސައި، އެ ކުލަބުން އެކަން ރަސްމީކޮށް ހާމަކޮށްފިއެވެ.
ކުލަބުން ނެރުނު ބަޔާނެއްގައި ވަނީ ސްލޮޓްގެ މޭސްތިރިކަމުގެ ދަށުން ޓީމުގެ މަސައްކަތްތައް ފެށުމަށް ހަމަޖެހިފައިވަނީ އަންނަ މަހުގެ އެކެއްގައި ކަމަށެވެ. ލިވަޕޫލުން ރަސްމީކޮށް މިކަން ހާމަކޮށްފައިވަނީ ހޯމަ ދުވަހެވެ.
ނެދަލަންޑްސްގެ ފެޔަނޫޑުގައި ސްލޮޓް ވަނީ ކާމިޔާބު މަސައްކަތްތަކެއް ކޮށްފައެވެ. އޭނާ ލިވަޕޫލަށް ބަދަލުވީ ފެޔަނޫޑާއެކު ކާމިޔާބު ތިން ސީޒަން ހޭދަކުރުމަށްފަހުއެވެ. އޭނާ ވަނީ 2023 ވަނަ އަހަރުގެ ނެދަލަންޑްސް ލީގު ކާމިޔާބުކޮށްފައެވެ. އަދި އެންމެ މޮޅު ކޯޗުގެ މަގާމު ދެ ފަހަރެއްގެ މަތިން އޭނާ ހޯދިއެވެ.
މީޑިއާ ރިޕޯޓުތައް ބުނާގޮތުން ސްލޮޓް ލިވަޕޫލާ ހަވާލުވާނީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. ލިވަޕޫލްއާއެކު އޭނާގެ ފުރަތަމަ މެޗަކަށް ވާނީ ޖުލައި 26 ވަނަ ދުވަހު ރެއާލް ބެޓިސްއާ ދެކޮޅަށް ކުޅޭ އެކުވެރިކަމުގެ މެޗެވެ.
ގިނަ ބަޔަކު އަންނަނީ ލިވަޕޫލުގެ ކޯޗުކަމުގައި ކްލޮޕް ހޭދަކުރިއިރު، އެ ޓީމަށް ހޯދައިދިން ކާމިޔާބީތައް ސްލޮޓަށް ތަކުރާރުކުރެވިދާނެ ކަމާމެދު ސުވާލު އުފައްދަމުންނެވެ. ކްލޮޕްގެ ކޯޗުކަމުގައި ލިވަޕޫލް ވަނީ އިނގިރޭސި ޕްރިމިއަރ ލީގާއި، ޔުއެފާ ޗެމްޕިއަންސް ލީގުވެސް ހޯދާފައެވެ.