އިނގިރޭސި ޕްރިމިއަރ ލީގުގެ ތަށި މި ފަހަރު ނުލިބުނު ނަމަވެސް، އާސެނަލްގެ ފެންވަރު މިހާރު ތަފާތު ކަމަށާއި، އެނބުރި އަންނާނީ މާ ވަރުގަދަކޮށް ކަމަށް އެ ޓީމުގެ ކޯޗު މިކޭލް އާޓެޓާ ބުނެފިއެވެ.
އެވަޓަން އަތުން 2-1 ގެ ނަތީޖާއަކުން އާސެނަލް މޮޅުވި ނަމަވެސް، ވެސްޓް ހޭމް އަތުން 3-1 ގެ ނަތީޖާއަކުން މެންޗެސްޓާ ސިޓީ މޮޅުވުމުން، ޖެހިޖެހިގެން ހަތަރުވަނަ ފަހަރަށް ސިޓީ ވަނީ ޗެމްޕިއަންކަން ހޯދާފައެވެ. އެއާއެކު މި ސީޒަން އާސެނަލް ނިންމާލީ 89 ޕޮއިންޓާއެކު ތާވަލުގެ ދެވަނަ މަގާމާއެކުއެވެ. މިދިޔަ ސީޒަންވެސް އާސެނަލް ނިންމާލީ ދެވަނައިގައި އޮވެގެންނެވެ.
އާޓެޓާ ބުނީ ލީގު ނުލިބުނު ނަމަވެސް ކުޅުންތެރިންގެ ކުޅުމާ މެދު ފަޚުރުވެރިވާ ކަމަށާއި، އާސެނަލް އެނބުރި އަންނާނީ ކުރިއަށްވުރެ ވަރުގަދަކޮށް ކަމަށެވެ. އަދި އާސެނަލުން ޔުއެފާ ޗެމްޕިއަންސް ލީގުވެސް ނަގާނެކަމަށް އާޓެޓާ ބުންޏެވެ.
އެވަޓަން މެޗަށްފަހު ވާހަކަދައްކަމުން އާޓެޓާ ބުނީ ޓީމު މިހާރު މަސައްކަތްކުރާ ގޮތަށް ކުރިއަށް އޮތް ތަނުގައި މަސައްކަތްކޮށްފި ނަމަ، ލީގު ކާމިޔާބުކުރެވޭނެ ކަމަށެވެ. ނަމަވެސް އެއީ ކޮން އިރަކުން ކަމެއް ބުނަން ނޭނގޭ ކަމަށްވެސް އާޓެޓާ ބުންޏެވެ.
މި ސީޒަން އާސެނަލް ފެށީ ވަރަށް ވަރުގަދަކޮށެވެ. ނަމަވެސް މުހިންމު މެޗުތަކުގައި ޕޮއިންޓް ގެއްލުމުގެ ސަބަބުން ސިޓީއަށް އޭގެ ފައިދާ ލިބުނީއެވެ. މިއަހަރު ލީގުގައި ކުޅުނު 18 މެޗުގެ ތެރެއިން އާސެނަލް މޮޅުވެފައިވަނީ 16 މެޗުންނެވެ.