ލިވަޕޫލްގެ ކޯޗުކަމަށްފަހު އެހެން ޓީމެއްގެ ކޯޗެއްގެ ގޮތުގައި ފެނުން ދުރު ކަމަށާއި، ލިވަޕޫލަކީ އެންމެ ފަހު ޓީމަށްވުން ގާތްކަމަށް ޔާގަން ކްލޮޕް ބުނެފިއެވެ.
ކްލޮޕްގެ ވަދާއީ މެޗަކީ އާދިއްތަ ދުވަހުގެރޭ އިނގިރޭސި ޕްރިމިއަރ ލީގުގައި ވުލްވްސް އަތުން އަމިއްލަ ދަނޑުގައި ލިވަޕޫލް މޮޅުވި މެޗެވެ. މިއީ 2015 ވަނަ އަހަރު ލިވަޕޫލުގެ ކޯޗުގެ މަގާމާ ހަވާލުވި ކްލޮޕް، އެ ކުލަބުގައި ކޯޗެއްގެ ގޮތުގައި މަސައްކަތްކުރި 491 ވަނަ މެޗެވެ.
ކްލޮޕްގެ ލީޑަޝިޕުގެ ދަށުން ލިވަޕޫލް ވަނީ ގިނަ ކާމިޔާބީތަކެއް ހޯދާފައެވެ. އެގޮތުން އެ ކުލަބުން ވަނީ ކްލޮޕްގެ މޭސްތިރިކަމުގެ ދަށުން 2020 ވަނަ އަހަރުގެ އިނގިރޭސި ޕްރިމިއަރ ލީގު ހޯދާފައެވެ. މިއީ ލިވަޕޫލްގެ 30 އަހަރުގެ ތާރީޚުގައި ފުރަތަމަ ފަހަރަށް ޕްރިމިއަރ ލީގު ލިބުނު ފަހަރެވެ. މީގެއިތުރުން ލިވަޕޫލުން ވަނީ 2019 ވަނަ އަހަރު ޔުއެފާ ޗެމްޕިއަންސް ލީގުވެސް ކާމިޔާބުކޮށްފައެވެ. އަދި މި ސީޒަންގައި ލިވަޕޫލުން ވަނީ ލީގު ކަޕުވެސް ކާމިޔާބުކޮށްފައެވެ.
ލިވަޕޫލްގައި މަސައްކަތްކުރި ފަހު މެޗަށްފަހު އުމުރުން 56 އަހަރުގެ ކްލޮޕް ވަނީ އޭނާގެ ކޯޗިން ކެރިއަރުގައި ލިވަޕޫލް ދޫކޮށްލަން ޖެހުމުން މިހާރު ހުރީ އެއްވެސް ކަމެއް ނުކޮށް ކަމަށް ބުނެފައެވެ. އަދި ފަހަރެއްގައި މިއީ ކޯޗެއްގެ ގޮތުގައި ފެންނާނެ އެންމެ ފަހު މަސައްކަތަށްވުން އެކަށީގެންވާ ކަމަށްވެސް ބުންޏެވެ.
ކްލޮޕް ބުނީ އެނބުރި ކޯޗިން ކެރިއަރަށް ދެން އަންނަން ބޭނުންވަނީ އެކަމަށް ތައްޔާރުވުމުން ކަމަށާއި، މާ ގިނަ ދުވަސްތަކެއް ވަންދެން ކޯޗިން ކެރިއަރުގައި ދެމިހުރުމުގެ ވިސްނުމެއް ނުގެންގުޅޭ ކަމަށެވެ. އަދި އެހެން ކުލަބަކާ މެދު އެންމެ އަވަހަށްވެސް ވިސްނާނީ އަހަރެއްހާ ދުވަސް ފަހުން ކަމަށްވެސް ކްލޮޕް ބުންޏެވެ.
ކްލޮޕްގެ ބަދަލުގައި ލިވަޕޫލްގެ ކޯޗަކަށް ހަމަޖައްސާފައިވަނީ ނެދަލަންޑްސްގެ އާނޭ ސްލޮޓެވެ.