ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމްގެ) ރައީސް ބައްސާމް އަދީލް ޖަލީލްގެ ޕާސްޕޯޓް ހިފަހައްޓާފައި އޮތް އޮތުން ޝަރީއަތް ނިމެންދެން ދަމަހައްޓަން ކްރިމިނަލް ކޯޓުން މިއަދު އަމުރުކޮށްފިއެވެ.
ބައްސާމްގެ މައްޗަށް ކުރަނީ ޚިޔާނާތާއި މަނީ ލޯންޑަރިންގެ ތުހުމަތެވެ. ދައުލަތުގެ އެދުމަކަށް ބައްސާމްގެ ޕާސްޕޯޓް ހިފަހައްޓާފައިވަނީ ޑިސެމްބަރު މަހު ކުރީކޮޅުގައެވެ. އެ މުއްދަތު އަންނަ މަހުގެ ކުރީކޮޅު ހަމަވާނެއެވެ. އެހެންކަމުން ދައުލަތުން އެދުނީ ބައްސާމްގެ ޕާސްޕޯޓް ޝަރީއަތް ނިމެންދެން ހިފަހައްޓައިދިނުމަށެވެ. ކޯޓުން ވަނީ އެ އަމުރު ނެރެފައެވެ.
ޕާސްޕޯޓް ހިފެހެއްޓުމާއި ގުޅިގެން ބައްސާމް ވަނީ ޝަރީއަތުގެ މަޖިލީހުގައި ކަންބޮޑުވުން ފާޅުކުރައްވާފައެވެ. އެއީ ބޮޑެތި ޒިންމާތަކެއް އަދާކުރަންޖެހޭތީ ކުރަންޖެހޭ ދަތުރުތަކެއް ހުރުމުން ކަމަށް ބައްސާމް ވިދާޅުވިއެވެ.
މިދިޔަ ބުރާސްފަތި ދުވަހާއި ހުކުރު ދުވަހު ތައިލެންޑްގައި ބޭއްވި އޭއެފްސީ އާއި ފީފާގެ ކޮންގްރެސްއަށް ވަޑައިގަތުމަށް ބައްސާމް ވަނީ ރަޖިސްޓަރީވެސް ކުރައްވާފައެވެ. ނަމަވެސް ކޯޓުގެ މި ނިންމުމާއި ގުޅިގެން ބައްސާމަށް އެ ކޮންގްރެސްގައި ބައިވެރިވަޑައެއް ނުގަނެއެވެ. މި ކޮންގްރެސްގައި ރާއްޖެ ތަމްސީލުކޮށްފައިވަނީ އެސޯސިއޭޝަނުގެ ނައިބު ރައީސް އަލީ އުމަރާއި ޖެނެރަލް ސެކްރެޓަރީ މުޙައްމަދު ޖައުޝަން ޝަރީފެވެ.
މިދިޔަ އަންގާރަ ދުވަހު ކުޅިވަރާއި ހަށިހެޔޮކަމާ ބެހޭ ވުޒާރާކުރަމުންދާ މަސައްކަތްތަކުގެ ތަފްސީލު ހިއްސާކުރުމަށް ބޭއްވި ނޫސްވެރިން ބައްދަލުވުމުގައި ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވިދާޅުވީ ރާއްޖޭގެ ގާނޫނު ހުރަސްނާޅާނަމަ، ފީފާގެ ކޮންގްރެސްގައި އެފްއޭއެމްގެ ކޮންމެ މަންދޫބަކު ތަމްސީލުކުރައްވަން ވަޑައިގަތަސް، އެކަމާ އިއުތިރާޒު ނުކުރައްވާނެ ކަމަށެވެ.
އެފްއޭއެމްގެ ފައިސާއަށް ޚިޔާނާތްތެރިވިކަމުގެ ތުހުމަތުގައި ދައުލަތުން ވަނީ ބައްސާމަށް ދައުވާކޮށްފައެވެ. މީގެއިތުރުން ޕީޖީ އޮފީހުން ވަނީ ބައްސާމަށް ގިނަ ތުހުމަތުތަކެއް ކޮށްފައެވެ. އެކަމަށް ހެކި ހޯދުމުގެ ގޮތުން ޕްރޮސިކިއުޓަރ ޖެނަރަލް ހުސައިން ޝަމީމް އަންގަވައިގެން ފުލުހުން ފެށި ތަހުގީގުގައި މިދިޔަ އޮކްޓޯބަރު މަހު އެފްއޭއެމްގެ އޮފީސްވެސް ރެއިޑްކުރިއެވެ. އަދި މަނީ ލޯންޑްރިން އާއި ގުޅޭ ގިނަ މައުލޫމާތުތަކެއް ވަނީ ހާމަކޮށްފައެވެ.