ކުޅިވަރުގެ ގައުމީ މަޖިލީހަކީ ހަރަކާތްތެރި މަޖިލީހެއް ކަމަށާއި، ކައުންސިލުގެ މައިގަނޑު މަސައްކަތް މީޑިއާއާ ހިސާބަށް ހާމަނުވަނީ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ކުޅިވަރުގެ މަޖިލީހުން މިހާރު ކުރަމުންދާ މަސައްކަތަކީ ގައުމީ ކުޅިވަރު އެސޯސިއޭޝަންތަކާއި، އެ އެސޯސިއޭޝަންތަކުގެ މައި އިދާރާތަކުގެ ގަވާއިދުތަކާއި އެސޯސިއޭޝަންތަކުގެ ގަވާއިދުތަކާއި، ދިވެހިރާއްޖޭގެ ގާނޫނާއި، ގަވާއިދުތަކާއި، އެއްހަމައެއްގައި މަސައްކަތްކުރުން ކަމަށް ރާފިޢު ވިދާޅުވިއެވެ.
"ބައެއްފަހަރު ވެފައި ހުންނަ ގޮތަކީ މައި އިދާރާތަކުގައި ހުންނަ ގަވާއިދުތައް، ސްޓެޓިއުޓްސްތައް ދިވެހި ބަހަށް ތަރުޖަމާކޮށްގެން، ދިވެހި ބަހުން އެ ހަދާފައި އޮންނަ ގަވާއިދެއް، ނޫނީ އުސޫލެއް ކޮމިޝަނަރު އޮފީހުގައި ރަޖިސްޓްރީކުރެވިފައި މި އޮންނަނީ.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ރާފިޢު ވިދާޅުވީ އިނގިރޭސި ބަހުން ހުންނަ ބައެއް ގަވާއިދުތައް ދިވެހި ބަހަށް ތަރުޖަމާކުރުމުން ފުށުއެރުންތަކެއް ހުންނަކަން ފާހަގަކުރެވިފައިވާ ކަމަށެވެ. އަދި ސަރުކާރުގެ އެހީތެރިކަމާއެކު އެސޯސިއޭޝަންތައް ހިންގަމުން އަންނައިރު، ކޮންމެ އެސޯސިއޭޝަނަކުންވެސް ތަބާވާން ޖެހޭނީ ރާއްޖޭގެ ގާނޫނާއި، ގަވާއިދުތަކަށް ކަމަށް ވަޒީރު ވިދާޅުވިއެވެ.
ރާފިޢު ވިދާޅުވީ މިހާރު ކުރެވޭ އެންމެ މުހިންމު މަސައްކަތަކީ މިހެން ހުރި ގަވާއިދުތައް އެއްހަމަކުރުމުގެ މަސައްކަތް ކަމަށެވެ. އަދި މި މަސައްކަތް ކުޅިވަރުގެ ގައުމީ މަޖުލީހުން ކުރަމުން އަންނައިރު، ގަވާއިދުތައް ހުންނާނީ އެއްވެސް ފުށޫއެރުމެއްނެތި ކަމަށްވެސް ވަޒީރު ވަނީ ވިދާޅުވެފައެވެ.
"އިލެކްޝަނާ ދިމާވެގެން އަންނަ މައްސަލަތަކާއި، ކޮންމެ ފަހަރަކުވެސް އަޅުގަނޑުމެން ތެރޭގައި ކަމެއް މެދުވެރިވުމުން، ދެން އެކަމެއް ހައްލުކުރަން އުޅޭއިރު ދިމާވާ އުނދަގޫތައް ފިލައިގެން ދާނީ މި ދެންނެވި ގޮތަށް ރިއާޔަތްވެގެން އައީމަހެން އަޅުގަނޑަށް ހީވަނީ.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ރާފިޢު ވިދާޅުވީ ކުޅިވަރު ކައުންސިލުން ކުރަމުން އަންނަ މަސައްކަތް ވަރަށް ގާތުން ބަލަމުން އަންނަ ކަމަށެވެ.