ފްރާންސްގެ ވެރިރަށް ޕެރިހުގައި ބާއްވާ އޮލިމްޕިކްސްއަށް ކޮލިފައިވި ރާއްޖޭގެ ފުރަތަމަ އެތުލީޓު ކަމަށްވާ ޓޭބަލް ޓެނިސް ތަރި ފާތުމަތު ދީމާ އަލީއަށް ފީއެސްއެމްއިން ޚާއްސަ މަރުހަބާއެއް ކިޔައިފިއެވެ.
ޕީއެސްއެމްއިން ޚާއްސަ މަރުހަބާއެއް ކިޔާފައިވަނީ "ކުޅިވަރު ވިންދު" ޕްރޮގްރާމް ބައިވެރިވުމަށް މިއަދު ދީމާ ޓީވީއެމްއަށް އައުމުންނެވެ. ޕީއެސްއެމްގެ ފަރާތުން މަރުހަބާ ދެންނެވީ މެނޭޖިން ޑައިރެކްޓަރ ޒީނާ ޒާހިރާއި، ޑެފިއުޓީ މެނޭޖިން ޑިރެކްޓަރ ޔާމީން ރަޝީދުގެ އިތުރުން ސްޕޯޓްސް ޓީމެވެ.
މި ހަފުތާގެ ޕްރޮގްރާމް ދީމާގެ ކާމިޔާބަށް ޚާއްސަކޮށްފައިވާއިރު، ދީމާގެ އިތުރުން މި ހަފުތާގެ ޕްރޮގްރާމުގައި ޓޭބަލް ޓެނިސް އެސޯސިއޭޝަނުގެ ނައިބު ރައީސް އިބްރާހީމް ޝިއުރީ ބައިވެރިވާނެއެވެ. ދީމާ ވަނީ މި ކާމިޔާބީ ހޯދުމަށް ކުރިމަތިވި ގޮންޖެހުންތަކާއި، ކުރި މަސައްކަތްތައް ޕްރޮގްރާމުގައި ހިއްސާކޮށްފައެވެ.
އުމުރުން މިހާރު 16 އަހަރުގެ ދީމާއަކީ ރާއްޖޭގެ ކުޅިވަރު ތާރީޚުގައި ފުރަތަމަ ފަހަރަށް އޮލިމްޕިކް ގޭމްސްއަށް ކޮލިފައިވި އެތުލީޓެވެ. ޕެރިހުގައި މި ފަހަރުގެ އޮލިމްޕިކްސް ކުރިއަށްދާނީ ޖުލައި 26 އިން އޮގަސްޓް 11 އަށެވެ.