މިއަދު މެންދުރު ނ.ވެލިދޫއަށް އުދައަރާ، ހަ ގެއަކަށް އުދައިގެ އަސަރުކޮށްފިއެވެ.
ވެލިދޫ ކައުންސިލް އިދާރާއިން ވިދާޅުވީ ރަށު ތެރެއިން 500 އެއްހާ ފޫޓަށް އުދައިގެ އަސަރުކޮށްފައިވާކަމަށެވެ. ނަމަވެސް މިޙާދިސާގައި މީހަކަށް އަދި އެއްވެސް އެއްޗަކަށްވެސް ގެއްލުމެއް ނުވާކަމަށް ކައުންސިލް އިދާރާއިން ވިދާޅުވެއެވެ.
ޕީ.އެސް.އެމަށް މަޢުލޫމާތު ދެއްވަމުން، ވެލިދޫ ކައުންސިލްގެ ނައިބު ރައީސް، އިބްރާހީމް އަލީ ވިދާޅުވީ، ފުރަތަމަ އުދަ އަރަންފެށީ ރަށުގެ ދެކުނު ފަރާތުން، މެންދުރު 12 ޖަހާކަށްހާއިރު ކަމަށެވެ. މެންދުރުފަހު ދެގަޑި ތިރީސް ވަންދެން އުދަ އެދިމާއަށް އުދަ އެރިކަމަށާ، އުދަ އަރަން ފެށުމުން، އުދަ އަރާފާނެކަމަށް ބެލެވޭ ގެތަކުގައި ވެލިބަސްތާ ޖަހާ ލޮނު ނުވަންނަ ގޮތް ހަދާފައިވާ ކަމަށް ވެލިދޫ ކައުންސިލުން ވިދާޅުވެއެވެ.
އިބްރާހީމް އަލީ ވިދާޅުވީ، ރަށުގެ ދެކުނު ފަރާތުން އުދައެރި ސަރަޙައްދުގެ ވެލިގަނޑު ދަމައިގަނެފައިވާތީ، އެރަށުގައި ހަރަކާތްތެރިވަމުންދާ އެމް.ޓީ.ސީ.ސީގެ ޓީމުން އެތަނުގައި ވެލިގަނޑު ހިމާޔަތް ކުރުމުގެ މަސައްކަތް ކޮށްފައިވާކަމަށެވެ. މިމަހުގެ ފަސް ވަނަ ދުވަހުން ފެށިގެން، އަށްވަނަ ދުވަހުގެ ނިޔަލަށް މެންދުރު ބާރަ ޖަހާއިރާއި، މެންދަމު 12 އަކީ ދިޔަވަރު ބޮޑުވާ ވަގުތުތައް ކަމަށްވުމާއެކު އެ ވަގުތުތަކުގައި ރާއްޖޭގެ ބައެއް ރަށްތަކަށް އުދައެރުން އެކަށީގެންވާ ކަމަށް އަންގާ، މޫސުމާ ބެހޭ ގައުމީ އިދާރާއިން ވަނީ އެކަމަށް އާންމުން ސަމާލުވުމަށް އިލްތިމާސްކޮށްފައެވެ.