ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ނޯތު މާލޭ ޒޯނުގެ ކުއާޓާ ފައިނަލާ ގާތަށް ހުވަފެން ފުށި ޖެހިލައިފިއެވެ.
ވަން އެންޑް އޮންލީ ރީތި ރަށުގައި ކުރިއަށްދާ ނޯތު މާލޭ ޒޯނުގައި އިއްޔެ ކުޅުނު ގްރޫޕް ބީގެ ފުރަތަމަ މެޗުގައި ހުވަފެން ފުއްޓާއި ޕަޓީނާ މޯލްޑިވްސް ވަނީ 3-3 ގެ ނަތީޖާއަކުން އެއްވަރުވެފައެވެ.
ވާދަވެރި ކުޅުމެއް ފެނިގެންދިޔަ މި މެޗު ފަށައިގެން ފުރަތަމަ މިނެޓުގައި ހުވަފެން ފުށިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އަޙްމަދު އައިހަމެވެ. އެކަމަކު މެޗުގެ 11 ވަނަ މިނެޓުގައި އަޙްމަދު ރާއީ ލަތީފް ވަނީ ލަނޑެއް ޖަހައި، ޕަޓީނާއަށް ނަތީޖާ އެއްވަރުކޮށްދީފައެވެ. މި މެޗުގެ 18 ވަނަ މިނެޓުގައި އައިހަމް ވަނީ އިތުރު ލަނޑެއް ޖަހައި، ހުވަފެން ފުއްޓަށް އަނެއްކާވެސް ލީޑު ނަގައިދީފައެވެ. ނަމަވެސް އޭގެ މިނެޓެއް ފަހުން އިބްރާހިމް ސަރުވާން ޖެހި ލަނޑާއެކު، ޕަޓީނާއިން ވަނީ ފުރަތަމަ ހާފު ނިމުމުގެ ކުރިން ނަތީޖާ އެއްވަރުކޮށްފައެވެ.
މި މެޗުގެ ދެވަނަ ހާފުގައި ސަރުވާން ވަނީ އިތުރު ލަނޑެއް ޖަހައި، މި މެޗުގައި ފުރަތަމަ ފަހަރަށް ޕަޓީނާއަށް ލީޑު ނަގައިދީފައެވެ. ނަމަވެސް އޭގެ ހަ މިނެޓު ފަހުން ހުވަފެން ފުށިން ނަތީޖާ އެއްވަރުކުރިއިރު، މި ލަނޑު އެ ޓީމަށް ކާމިޔާބުކޮށްދިނީ ހަސަން ސާހިލެވެ.
މީގެ އިތުރުން މި މުބާރާތުގައި އިއްޔެ ކުޅުނު ގްރޫޕް ބީގެ ދެވަނަ މެޗުން ވަރު ބައި އެޓްމޮސްފެއާ ވަނީ އޮބްލޫ އެކްސްޕީރިއެންސް އަތުން 3-0 ގެ ނަތީޖާއަކުން މޮޅުވެފައެވެ.
ބޯ ވާރޭގައި ކުޅުނު މި މެޗުގެ 15 ވަނަ މިނެޓުގައި ވަރު ޓީމުގެ ހައްޔާން ޝަރީފް ވަނީ ލަނޑެއް ޖަހައި، އެ ޓީމަށް ލީޑު ނަގައިދީފައެވެ. އަދި މެޗުގެ ދެވަނަ ހާފު ފަށައިގެން ހަވަނަ މިނެޓުގައި ކެޕްޓަން މުޙައްމަދު ފަޒީލް ވަނީ ލަނޑެއް ޖަހައި، ވަރު ޓީމުގެ ލީޑު ފުޅާކޮށްދީފައެވެ. ދެން މި މެޗުގައި ވަރު ޓީމުން ކާމިޔާބުކުރި ފަހު ލަނޑަކީ މެޗުގެ 39 ވަނަ މިނެޓުގައި އޮބްލޫގެ އަޙްމަދު ޖާއިޝް އަތުން ބައިކޮޅަށް ވަން ލަނޑެކެވެ.
މި ނަތީޖާތަކާއެކު ގްރޫޕް ބީގެ އެއްވަނައިގައި ހުވަފެން ފުށި އޮތީ ކުޅުނު ދެ މެޗުން ލިބުނު ހަތަރު ޕޮއިންޓާއެކުއެވެ. ދެވަނައަށް ކުރިއަށް ޖެހިލި ވަރު ޓީމަށް ވަނީ ތިން ޕޮއިންޓް ލިބިފައެވެ.