ދެން އޮތް އަމާޒަކީ އޮލިމްޕިކް ގޭމްސްއިން ރާއްޖެއަށް މެޑަލް ހޯދައިދިނުން ކަމަށް ރާއްޖޭގެ ކުޅިވަރު ތާރީޚުގައި ފުރަތަމަ ފަހަރަށް އޮލިމްޕިކްސްއަށް ކޮލިފައިވި ޓޭބަލް ޓެނިސް ތަރި ފާތިމަތު ދީމާ އަލީ ބުނެފިއެވެ.
ނޭޕާލުގައި ކުރިއަށްދިޔަ ދެކުނު އޭޝިއާ ސަރަހައްދުގެ ކޮލިފިކޭޝަންގެ ޗެމްޕިއަންކަން ހޯދައި، ދީމާ ވަނީ ރާއްޖޭގެ ކުޅިވަރުގެ ތާރީޚުން ޖާގަ ހޯދާފައެވެ. އެގޮތުން އުމުރުން 16 އަހަރުގެ ދީމާ އަކީ ކޮލިފައިންގައި ކުޅެ، އޮލިމްޕިކްސްއަށް ކޮލިފައިވި ފުރަތަމަ ދިވެހި އެތުލީޓެވެ. ދީމާ އޮލިމްޕިކްސްއިން ޖާގަ ހޯދީ ނޭޕާލުގައި ކުރިއަށްދިޔަ ކޮލިފިކޭޝަނުގެ ފައިނަލުގައި ސްރީ ލަންކާގެ ބަންޑާރާ ބިމަންދީ 4-1 ސެޓުން ބަލިކޮށްގެންނެވެ.
ދީމާގެ ކާމިޔާބީ ފާހަގަކުރުމަށް ބޭއްވި ޚާއްސަ ރަސްމިއްޔާތުގައި "ޕީއެސްއެމް ސްޕޯޓްސް" އާ ވާހަކަދައްކަމުން ދީމާ ބުނީ މިހާ ހިސާބަށް އާދެވުނީ ވަރަށް ގިނަ ބައެއްގެ އެހީތެރިކަމާއެކު ކަމަށާއި، ޚާއްސަކޮށް މައިންބަފައިންގެ އެއްބާރުލުން ފާހަގަކުރާ ކަމަށެވެ. އަދި ދިވެހި ޓީޓީ އާއިލާ އާއި، އެކުވެރިންގެ ފަރާތުންވެސް ބޮޑު އެހީތެރިކަމެއް ލިބުނު ކަމަށާއި، މިއީ ކެރިއަރުގައި ކުރިއަށްދާން ލިބުނު އެންމެ ބޮޑު ހިތްވަރު ކަމަށްވެސް ވަނީ ބުނެފައެވެ. އޮލިމްޕިކްސްއަށް ކޮލިފައިވުމާއެކު ދެން އޮތީ ކޮން އަމާޒެއްތޯ ސުވާލުކުރުމުން ދީމާ ބުނީ ކުރިއަށް އޮތީ އޮލިމްޕިކްސްއިން ރާއްޖެއަށް މެޑަލް ހޯދައިދިނުން ކަމަށެވެ.
އަންނަ ޖުލައި މަހުގައި ފްރާންސްގެ ވެރިރަށް ޕެރިހުގައި އޮންނަ އޮލިމްޕިކްސްގައި ދީމާ ދިވެހި ދިދަ އުފުލާލާއިރު، މީގެ ކުރިން ރާއްޖޭގެ ކުޅުންތެރިން އޮލިމްޕިކްސްގައި ވާދަކޮށްފައިވަނީ ކޮލިފައިނުވާ ގައުމުތަކުގެ ތެރެއިން ލިބޭ އިންވިޓޭޝަނަލް (ޓްރައިޕާޓައިޓް) ގެ ފުރުސަތުގައެވެ. އެ ގޮތުން 1988 ވަނަ އަހަރުން ފެށިގެން އެތުލެޓިކްސް އާއި، ފެތުން އަދި ބެޑްމިންޓަނުން ރާއްޖެއަށް ލިބޭ އިންވިޓޭޝަނަލް ފުރުސަތުތަކުގައި، އެތުލީޓުން ވަނީ ވާދަކޮށްފައެވެ.