ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ނޯތު މާލޭ ޒޯނުގެ ކުއާޓާ ފައިނަލަށް އެންމެ ފަހުގެ ޗެމްޕިއަން ވަން އެންޑް އޮންލީ ރީތި ރަށާއި، ރަނަރަޕް ބަނޑޮސް މޯލްޑިވްސް ދަތުރުކޮށްފިއެވެ.
ރީތި ރަށުގައި ކުރިއަށްދާ ނޯތު މާލޭ ޒޯނުގައި މިއަދު ކުޅުނު ގްރޫޕް އޭގެ ދެވަނަ މެޗުން އެ ޓީމު މޮޅުވީ ކުޑަ ހުރާ އަތުން 2-1 ގެ ނަތީޖާއަކުންނެވެ.
މި މެޗު ފަށައިގެން ރީތި ރަށުގެ ފަރާތުން ރަނގަޅު ކުޅުމެއް ފެނިގެންދިޔައިރު، މެޗުގެ ނުވަވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން މުޙައްމަދު ނާފިއުއެވެ. އަދި ދެވަނަ ހާފު ފަށައިގެން ހަވަނަ މިނެޓުގައި ސަމްހާން އަބްދުއް ރަހްމާން ވަނީ ލަނޑެއް ޖަހައި، ރީތި ރަށުގެ ލީޑު ފުޅާކޮށްދީފައެވެ.
އޭގެ ފަހުން މި މެޗުގައި ކުޑަ ހުރާއިން ކުޅުން ރަނގަޅުކުރިއިރު، މެޗުގެ 34 ވަނަ މިނެޓުގައި އެ ޓީމުން ވަނީ ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު މަޒީނެވެ.
މީގެ އިތުރުން ގްރޫޕް އޭގައި މިއަދު ކުޅުނު ދެވަނަ މެޗުން ބަނޑޮސް މޮޅުވީ ހިލްޓަން މޯލްޑިވްސްއާ ވާދަކޮށް، ފަހަތުން އަރައި 2-1 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މެޗުގައި ދެވަނަ ހާފުގައި އެންމެ ފުރަތަމަ ލީޑު ނެގީ ހިލްޓަންއިންނެވެ. މި ހާފު ފެށުނުތަނާ މި ލަނޑު އެ ޓީމަށް ކާމިޔާބުކޮށްދިނީ އަޙްމަދު އަޝްހަމެވެ. އެކަމަކު މެޗުގެ ފަހު ވަގުތުގައި ބަނޑޮހުން ވަނީ އެ ޓީމު ކޮޅަށް ނަތީޖާ އަނބުރާލާފައެވެ. އެގޮތުން މެޗުގެ ފަހު މިނެޓުގައި އަޙްމަދު ރީހާންގެ ލަނޑާއެކު ބަނޑޮހުން ނަތީޖާ އެއްވަރުކުރިއިރު، އިތުރު ވަގުތުގައި އެ ޓީމު މޮޅުކޮށްދިން ލަނޑު ކާމިޔާބުކޮށްދިނީ ހަސަން މުއާންއެވެ.
މި މެޗުން ބަނޑޮސް މޮޅުވިއިރު، މި މުބާރާތުގައި އެ ޓީމު އެންމެ ފުރަތަމަ ބައްދަލުކޮށްފައިވަނީ ކުޑަ ހުރާއާއެވެ. އެ މެޗު 6-3 ގެ ނަތީޖާއަކުން ކުޑަ ހުރާއިން ކާމިޔާބުކުރި ނަމަވެސް، މުބާރާތުގެ ގަވާއިދުން ބޭރުން ކުޅުންތެރިއަކު ހިމެނުމާއެކު، އެ މެޗުން ތިން ޕޮއިންޓާއި ފައިދާ ދެ ލަނޑު ލިބިފައިވަނީ ބަނޑޮހަށެވެ. އަދި ކުޑަ ހުރާ ވަނީ 5000 ރުފިޔާއިން ޖޫރިމަނާކޮށްފައެވެ.
މި ނަތީޖާތަކާއެކު ބަނޑޮހާއި ރީތި ރަށަށް ހަ ޕޮއިންޓް ލިބިފައިވާއިރު، މި ގްރޫޕުގެ އެއްވަނަ ކަނޑައެޅޭނީ މި ދެ ޓީމު ބައްދަލުކުރާ މެޗުންނެވެ. އެ މެޗު ކުޅުމަށް ހަމަޖެހިފައިވަނީ މި މަހުގެ 21 ވަނަ ދުވަހެވެ.