ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ނޯތު މާލޭ ޒޯނުގެ ފެށުން އޯގާ އަރޓް ރިސޯޓާއި އޮބްލޫ ސެލެކްޓް ސަންގެލިން ރަނގަޅުކޮށްފިއެވެ.
ވަން އެންޑް އޮންލީ ރީތި ރަށުގައި ކުރިއަށްދާ ނޯތު މާލޭ ޒޯނުގައި މިއަދު ކުޅުނު ގްރޫޕް ސީގެ މެޗުން އޯގާ މޮޅުވީ ކޮކޯ ބޮޑު ހިިތި އަތުން 4-0 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި އޯގާއިން ތިން ލަނޑުގެ ލީޑެއް ނެގިއިރު، އެ ޓީމުގެ ފުރަތަމަ ލަނޑު މެޗު ފަށައިގެން ތިންވަނަ މިނެޓުގައި ކާމިޔާބުކޮށްދިނީ އަލީ އަކުރަމެވެ. އަދި މެޗުގެ 12 ވަނަ މިނެޓުގައި އިބްރާހީމް ރިޔާޒް އޯގާއަށް ލީޑު ފުޅާކޮށްދިންއިރު، ފުރަތަމަ ހާފުގެ ފަހު މިނެޓުގައި ހުސައިން ޝާފީ އެ ޓީމުގެ ތިންވަނަ ލަނޑު ޖަހައިދީފައެވެ. މި މެޗުގައި އޯގާއިން ކާމިޔާބުކުރި ފަހު ލަނޑު ދެވަނަ ހާފުގެ ކުރީކޮޅު ޖަހައިދިނީ މުޙައްމަދު އިރާޝެވެ.
މީގެ އިތުރުން މިއަދު ކުޅުނު ގްރޫޕް ޑީގެ މެޗުން ސަންގެލި މޮޅުވީ ބަރޮސް މޯލްޑިވްސް އަތުން 4-0 ގެ ނަތީޖާއަކުންނެވެ.
މި މެޗު ފަށައިގެން ފަސްވަނަ މިނެޓުގައި ސަންގެލިން ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީ އާދަމް ނަސީރެވެ. އަދި އޭގެ ހަ މިނެޓު ފަހުން މުޙައްމަދު ވަޖީހު ވަނީ ލަނޑެއް ޖަހައި، އެ ޓީމުގެ ލީޑު ފުޅާކޮށްދީފައެވެ.
މި މެޗުގައި ސަންގެލިން ކާމިޔާބުކުރި ތިންވަނަ ލަނޑު ދެވަނަ ހާފު ފަށައިގެން ދެވަނަ މިނެޓުގައި ޖަހައިދިނީ މުޙައްމަދު އިއުފާފް އަބްދުﷲ އެވެ. އަދި އެ ޓީމުގެ ފަހު ލަނޑު މެޗުގެ 37 ވަނަ މިނެޓުގައި ކާމިޔާބުކޮށްދިނީ މުޙައްމަދު ނިހާނެވެ.