ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ނޯތު މާލޭ ޒޯނުގައި އޮބްލޫ އެކްސްޕީރިއެންސް އާއި ޕަޓީނާ މޯލްޑިވްސް ބައްދަލުކުރި މެޗު އެއްވަރުވިއިރު، ވަރު ބައި އެޓްމޮސްފެއާ ބަލިކޮށް ހުވަފެން ފުށިން ފެށުން ރަނގަޅުކޮށްފިއެވެ.
ވަން އެންޑް އޮންލީ ރީތި ރަށުގައި ކުރިއަށްދާ ނޯތު މާލޭ ޒޯނުގައި މިއަދު ކުޅުނު ގްރޫޕް ބީގެ ފުރަތަމަ މެޗުގައި އޮބްލޫ އާއި ޕަޓީނާ ވަނީ 2-2 ގެ ނަތީޖާއަކުން އެއްވަރުވެފައެވެ.
ވާދަވެރި ކުޅުމެއް ފެނިގެންދިޔަ މި މެޗު ފަށައިގެން ތިންވަނަ މިނެޓުގައި އޮބްލޫއިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޝަމްވީލް އިބްރާހީމެވެ. އަދި މި މެޗުގެ ދެވަނަ ހާފު ފަށައިގެން ފުރަތަމަ މިނެޓުގައި މުޙައްމަދު ސަހާއު އަލީ ވަނީ ލަނޑެއް ޖަހައި، އޮބްލޫގެ ލީޑު ފުޅާކޮށްދީފައެވެ.
މި މެޗުގައި ޕަޓީނާއިން ފަރަގު ކުޑަކޮށްފައިވަނީ ދެވަނަ ހާފުގެ 10 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ އިބްރާހީމް ސަރުވާނެވެ. އަދި އޭގެ ދެ މިނެޓު ފަހުން މުޙައްމަދު ޝާހީ ވަނީ ލަނޑެއް ޖަހައި، ޕަޓީނާއަށް ނަތީޖާ އެއްވަރުކޮށްދީފައެވެ.
މީގެ އިތުރުން މިއަދު ކުޅުނު ގްރޫޕް ބީގެ ދެވަނަ މެޗުން ހުވަފެން ފުށި މޮޅުވީ ވަރު އަތުން ފަހަތުން އަރައި 3-4 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި ވަރުގެ ފަރާތުން މޮޅު ކުޅުމެއް ފެނިގެންދިޔައިރު، އެ ޓީމުން ވަނީ މި ހާފުގައި ދެ ލަނޑުގެ ލީޑެއް ނަގާފައެވެ. މި ދެ ލަނޑުވެސް އެ ޓީމަށް ކާމިޔާބުކޮށްދިނީ ހައްޔާން ޝަރީފެވެ. އަދި މި މެޗުގެ ދެވަނަ ހާފުގައި ހައްޔާން ވަނީ އިތުރު ލަނޑެއް ޖަހައި، ހެޓްރިކް ހަދާފައެވެ.
މި މެޗުގެ ދެވަނަ ހާފުގައި ކުޅުން ރަނގަޅުކޮށް ހުވަފެން ފުށިން އެ ޓީމު ކޮޅަށް ނަތީޖާ އަނބުރާލިއިރު، އެ ޓީމުގެ އަބްދުﷲ ސާހިލްވެސް ވަނީ މި މެޗުގައި ހެޓްރިކެއް ހަދާފައެވެ. އަދި އެ ޓީމުގެ އަނެއް ލަނޑު ކާމިޔާބުކޮށްދިނީ އަޙްމަދު އައިމަނެވެ.