ރާއްޖެ ތަމްސީލުކުރާ ގައުމީ ޓީމުތަކުން ބޭރުގެ މުބާރާތްތަކަށް ދާއިރު، އެ ތައްޔާރުވާ މިންވަރު މޮނީޓަރ ކުރެވޭނެ ނިޒާމެއް އޮތުން މުހިންމު ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ކުޅިވަރާ ބެހޭ ވުޒާރާއިން ކުރަމުންދާ މަސައްކަތްތަކުގެ ތަފްސީލު ހިއްސާކުރުމަށް ބޭއްވި ނޫސްވެރިން ބައްދަލުވުމުގައި ވާހަކަދައްކަވަމުން ރާފިޢު ވިދާޅުވީ ގައުމީ ޓީމުތަކުން މަހެއްގެ ތެރޭގައި ކުރާ ފަރިތަކުރުންތަކާއި ހަރަކާތްތެރިވާ މިންވަރު ބަލަންޖެހޭ ކަމަށެވެ. އަދި ބައެއް ގައުމީ ޓީމުތަކުން މުބާރާތް ގާތްވުމުން، އެ މުބާރާތަކަށް ތައްޔާރުވެގެން ދާ މައްސަލައަކީ ކުޅިވަރާ ބެހޭ ވުޒާރާއިން ވަރަށް ބޮޑަށް ކަންބޮޑުވާ ކަމެއް ކަމަށްވެސް ވަނީ ވިދާޅުވެފައެވެ.
ރާފިޢު ވިދާޅުވީ މިހާރުވެސް އެކަންކަން ބަލައި، އިސްލާހުކުރުމަށް މިހާރުވެސް މަޝްވަރާކުރަމުން އަންނަ ކަމަށެވެ. އަދި ކުޅުންތެރިންނަށް ދޭން ޖެހޭ މުސާރައާ ގުޅިގެން، އެންމެ ދަށްވެގެން ބަލަން ޖެހޭ ކަންތައްތަކެއްވެސް ހިމެނިފައި އޮންނަން ޖެހޭ ކަމަށްވެސް ވަނީ ވިދާޅުވެފައެވެ.
"އަޅުގަނޑުމެންނަށްވެސް އަންނަ ސުވާލަކީ، އަޅުގަނޑުމެން ނެޝަނަލް ޓީމުތަކަށް ބަރާބަރަށް މުސާރަ ދެމޭ. އެހެން ނަމަވެސް ނެޝަނަލް ޓީމުތަކުގެ އެކްޓިވިޓީ ކިހާ ދުވަހަކުހޭ އެކްޓިވްކޮށް އޮންނަނީ، ނުކުޅެ ހަ މަސް ވިޔަސް މުސާރަ ދޭންވީހޭ.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ވަޒީރު މިހެން ވިދާޅުވިއިރު، ރާއްޖެއަށް ބީޗް ވޮލީބޯޅައިން މެޑަލް ގެނެސްދީފައިވާ ކުރީގެ ބީޗް ވޮލީބޯޅަ ކުޅުންތެރިޔާ ޝިއުނާޒް އަބްދުލް ވާހިދު ވަނީ ކުޅިވަރާ ބެހޭ ވުޒާރާއަށް މީގެ ކުރިން އިލްތިމާސެއް ކޮށްފައެވެ. އެއީ މުބާރާތަށް ދާން ޓީމުތަކަށް އެ ވުޒާރާގެ ބަޖެޓް ހަމަޖައްސައިދޭއިރު، ތައްޔާރުވެފައިވާ މިންވަރު ބެލުމަށްފަހު އެކަން ކުރުމަށް ބުނެއެވެ.