މި މަހު ބޭއްވުމަށް ހަމަޖެހިފައިވާ އެތުލެޓިކްސް އެސޯސިއޭޝަން އޮފް މޯލްޑިވްސްގެ އިންތިޚާބުގައި ވާދަކުރެއްވުމަށް 12 އަހަރު ފަހުން އައު ރައީސަކު ކުރިމަތިލައްވައިފިއެވެ.
އެތުލެޓިކްސް އެސޯސިއޭޝަނުގެ އިންތިޚާބުގައި ކޮންމެ މަގާމަކަށްވެސް ކުރިމަތިލައްވާފައިވަނީ އެންމެ ބޭފުޅެކެވެ. އެގޮތުން އިންތިޚާބުގައި ރައީސްކަމަށް ކުރިމަތިލައްވާފައިވަނީ މުސްޠަފާ މުޙައްމަދެވެ.
ކޮމިޝަނަރ އޮފް ސްޕޯޓްސްގެ މަގާމަށް މުޙައްމަދު ޠަލާލް އައްޔަނުކުރެއްވުމާއެކު، އެތުލެޓިކްސް އެސޯސިއޭޝަންގެ ރައީސްގެ މަގާމު ވަނީ ހުސްވެފައެވެ. މި ފަހަރުގެ އިންތިޚާބުގައި ރައީސްގެ މަގާމަށް މުސްތަފާ ކުރިމަތިލެއްވިއިރު، އެތުލެޓިކްސް އެސޯސިއޭޝަންގެ ރައީސްގެ މަގާމުން ޠަލާލް އިސްތިއުފާދެއްވީ، އެ އެސޯސިއޭޝަންގެ ރައީސްގެ ގޮތުގައި ތިންވަނަ ދައުރެއް ފުރިހަމަ ކުރައްވަމުންނެވެ.
ކުރިއަށް އޮތް އިންތިޚާބުގައި ނައިބު ރައީސްގެ މަގާމަށް ކުރިމަތިލެއްވީ މިހާރުވެސް އެ މަގާމު ފުރުއްވަމުން އަންނަ އަޙްމަދު އަޒީލެވެ. އަޒީލް ވަނީ ކުރީގެ ރައީސް ޠަލާލް މަގާމުން އިސްތިއުފާދެއްވުމުން، މިދިޔަ ފަސް ވަރަކަށް މަސް ދުވަހު އެ އެސޯސިއޭޝަނުގެ ކަންކަން ހިންގުމުގައި އެންމެ އިސް ފަރާތެއްގެ ގޮތުގައި ހަރަކާތްތެރިވެފައެވެ.
އެތުލެޓިކްސް އެސޯސިއޭޝަނުގެ ހަޒާންދާރުގެ މަގާމަށް ކުރިމަތިލެއްވީ ހަސްނާއު ރަޝީދު ހުސައިނެވެ. އަދި އާންމު މެންބަރުންގެ ގޮތުގައި ކުރިމަތިލެއްވީ މިހާރުވެސް އެ މަގާމު ފުރުއްވަމުން އަންނަ ހުސެއިން އަމީން އާއި، ކުރީގެ ދެ މެންބަރުން ކަމަށްވާ މުޙައްމަދު ޝާހިދު އަދި މުޙައްމަދު ޝުޖާއުއެވެ. މީގެ އިތުރުން އަންހެން މެންބަރަކަށް ކުރިމަތިލެއްވީ ކުރީގެ އެއްވަނަ ދުވުންތެރިޔާ ޔަޒުނީ ނަޝީދާ (ޔަޒޫ) އެވެ.
މި ފަހަރު ކުރިމަތިލެއްވި ބޭފުޅުންގެ ތެރޭގައި ގިނައީ އެތުލެޓިކްސްގައި ޓެކްނިކަލް އޮފިޝަލުންގެ ގޮތުގައި މަސައްކަތްކޮށްފައިވާ ބޭފުޅުންނެވެ. އެތުލެޓިކްސް އެސޯސިއޭޝަންގެ އިންތިޚާބު ބޭއްވުމަށް ހަމަޖެހިފައިވަނީ މި މަހުގެ 24 ވަނަ ދުވަހެވެ.