ޤާނޫނަށް އިސްލާހު ގެނެސްގެންވެސް ފަތުރުވެރިކަމުގެ މަތީ މަގާމުތަކަށް ދިވެހިން ގެންނާނަން: ވަޒީރު

ފަތުރުވެރިކަމުގެ ޤާނޫނަށް އިސްލާހު ގެނެސްގެން ނަމަވެސް ދާއިރާގެ މަތީ މަޤާމުތައް ދިވެހިންނަށް ހޯއްދަވައިދެއްވާނެކަމަށް ފަތުރުވެރިކަމާ ބެހޭ ވަޒީރު އިބްރާހިމް ފައިޞަލް ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ފަތުރުވެރިކަމާ ބެހޭ ވަޒީރު އިބްރާހިމް ފައިޞަލް ވިދާޅުވީ ކޮންމެ ކަމަކީ ޤާނޫނަކުން ނުވަތަ ޤަވައިދަކުން ކުރަން ވެއްޖެނަމަ އެއީ އެންމެ އެދެވޭ ގޮތް ކަމަށް ނުވެދާނެ ކަމަށެވެ. އެހެންނަމަވެސް ޓޫރިޒަމް ގާނޫނަށް އިސްލާހު ގެނެސްގެން ވިޔަސް ދާއިރާގެ އިސް އަދި މުހިންމު މަގާމުތަކަށް ދިވެހިން ގެނެވޭތޯ މަސައްކަތް ކުރައްވާނެކަމަށް ވަޒިރު ވިދާޅުވިއެވެ.

ވަޒީރު ވިދާޅުވީ އެފަދަ މަގާމުތަކަށް ދިވެހިން ގެނެސް ފަތުރުވެރިކަމުގެ ދާއިރާ ދިވެހިން ލީޑުކުރާ މަންޒަރު ފެނުމަކީ ހަމައެކަނި އެމަނިކުފާނުގެ ހުވަފެނެއް ނޫން ކަމަށެވެ. އެއީ ސަރުކާރުގެ އަދި ޚާއްސަކޮށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް ބޭނުންފުޅުވާ ގޮތްކަމަށް ވަޒީރު ވިދާޅުވިއެވެ.

"އަޅުގަނޑާ ދިމާވެފައި އެބަތިބި 20، 25 އަހަރު މަސައްކަތްކޮށްގެން ސޭލްސް ޑައިރެކްޓަރުންނަށް ވެފައި ތިބި މީހުން. މީ ހަމަ ވަރަށް ވަރުގަދަ މަގާމުތައް. އެހެންވީމަ އޭގެން އެ ދޭހަކޮށްދެނީ އެފޯޓެއް ލާފަ ހިތްވަރާއެކު މަސައްކަތްކުރާ ކޮންމެ ޒުވާނަކަށް ކާމިޔާބު ވާނެ ކަން. އަޅުގަނޑުމެން ބަލާނަން ޓޫރިޒަމް ގާނޫނަށް އިސްލާހު ގެނެސްގެން ވެސް ދިވެހިންނަށް މި ދާއިރާގައި ހުރި ޖެނެރަލް މެނޭޖަރުން ގޮތުގައި، އެޗްއާރް ޑިޕާޓްމަންޓް ހެޑުންގެ ގޮތުގައި މިގޮތަށް ހުރި މުހިންމު ވަޒީފާތަކަށް ދިވެހިންނަށް ފުރުސަތު ހޯދައިދިނުމަށް." ފަތުރުވެރިކަމާ ބެހޭ ވަޒީރު އިބްރާހިމް ފައިޞަލް ވިދާޅުވިއެވެ.

ވަޒީރު ވިދާޅުވީ ޤާނޫނުގެ ތެރެއިންނާއި ސްކޮލަޝިޕްތަކާއި ފުރުޞަތުތައް ހޯދައދީގެން ރިސޯޓްތަކުގެ އިސްމަޤާމުތަކަށް ދިވެހިން ގެނައުމަކީ އަމާޒެއްކަމަށެވެ. އަދި ފަތުރުވެރިކަމުގެ ސިނާއަތުގައި ދިވެހިންނަށް ހުރި ފަހި ފުރުސަތުތައް ހޯދައި ދިނުމަށް ކަމުގެ ތަޖުރިބާ ހުރި ފަރާތްތަކާ ގުޅިގެން ކުރެވެން ހުރި ހުރިހާ މަސައްކަތެއް ކުރައްވާނެ ކަމަށް ވަޒީރު ވިދާޅުވިއެވެ.

އެންމެ ފަހުގެ ބޯހިމެނުމުން ދައްކާގޮތުން ރާއްޖޭގެ ފަތުރުވެރިކަމުގެ ސިނާއަތުގައި 58،089 މީހުން އަންނަނީ މަސައްކަތް ކުރަމުންނެވެ. މީގެތެރެއިން %40 އަކީ ދިވެހިންނެވެ. ފަތުރުވެރިކަމުގެ ސިނާއަތުގައި މަސައްކަތްކުރާ ދިވެހިންގެ ޖުމްލަ އަދަދަކީ 22،337 އެވެ. އަދި 35،000އަށްވުރެ ގިނަ ބިދޭސީން މި ސިނާއަތުގައި ހަރަކާތްތެރިވެއެވެ.

ފަތުރުވެރިކަމުގެ ސިނާއަތުގައި މަސައްކަތްކުރާ ދިވެހިންގެ އަދަދު މަދުވުމާއެކު މިކަމުގެ ކަންބޮޑުވުން ދަނީ އެކި ފަރާތްތަކުން ފާޅުކުރަމުންނެވެ. މިކަމާއި ގުޅޭގޮތުން ފަތުރުވެރިކަމާ ބެހޭ ވަޒީރު މީގެ ކުރިން ވިދާޅުވެފައިވަނީ ފަތުރުވެރިކަމުގެ ސިނާއަތުގައި މަސައްކަތްކުރާ ދިވެހިންގެ އަދަދު ވަކިން ޚާއްސަކޮށް މަތީ ފަންތީގައި މަސައްކަތްކުރާ ދިވެހިންގެ އަދަދު އިތުރުކުރުމަށް އެންމެ މުހިންމު ކަމަކީ ރަނގަޅު ހޮޓެލް ސްކޫލެއްކަމަށާއި، އެއީ ރައީސްގެ ޚާއްސަ ވައުދުފުޅެއްކަމަށެވެ.

މި ހޮޓެލް ސްކޫލް ޤާއިމްކުރެވިގެންދާނީ ދުނިޔޭގެ ފެންވަރުގެ ހޮޓެލް ސްކޫލަކާއި އެފިލިއޭޓްވެގެންކަމަށްވެސް ވަޒީރު ފައިސަލް ވިދާޅުވިއެވެ. މި ހޮޓެލް ސްކޫލާއެކު ދުނިޔޭގެ އެކި ސަރަހައްދުތަކުން ރާއްޖެއަށް ކިޔަވަން އައުމަށް މަގުފަހިވެގެންދާނެ ކަމަށްވެސް ވަޒީރު ވިދާޅުވިއެވެ.