ކުރިއަށް އޮތް ސްވިމިން އެސޯސިއޭޝަން އޮފް މޯލްޑިވްސްގެ އިންތިޚާބުގައި ރައީސްގެ މަގާމަށް ކުރިމަތިލެއްވީ މިހާރުވެސް އެ މަގާމުގައި ހުންނެވި މުޙައްމަދު އަބްދުލް ސައްތާރު (ޗަމްޕީ) އެކަނި ކަމަށް އެ އެސޯސިއޭޝަނުން ބުނެފިއެވެ.
ސްވިމިން އެސޯސިއޭޝަނުން ވަނީ އެ އެސޯސިއޭޝަނުގެ ފަސްވަނަ އިންތިޚާބު އަންނަ ޖޫން މަހުގެ އެއްވަނަ ދުވަހު ބާއްވަން ތާވަލުކޮށްފައެވެ. އެ އިންތިޚާބުގައި ވާދަކުރަން ކެންޑިޑެސީ ފޯމު ހުށަހަޅަން ހުޅުވާލި ފުރުސަތު މިއަދު ހަމަވިއިރު، ކޮންމެ މަގާމަކަށްވެސް ކުރިމަތިލައްވާފައިވަނީ އެންމެ ބޭފުޅެކެވެ.
އެގޮތުން ރައީސްގެ މަގާމަށް ސައްތާރު މި ފަހަރުވެސް ކުރިމަތިލެއްވިއިރު، އޭނާ އަންނަނީ އެ އެސޯސިއޭޝަންގެ ރައީސްގެ މަގާމު ތިންވަނަ ދައުރަކަށް ފުރިހަމަކުރައްވަމުންނެވެ. އަދި 2020 ވަނަ އަހަރުގެ ޖުލައި މަހު ބޭއްވި ސްވިމިން އެސޯސިއޭޝަންގެ ހަތަރުވަނަ އިންތިޚާބުގައިވެސް ރައީސްގެ މަގާމަށް ކުރިމަތިލެއްވީ ސައްތާރު އެކަންޏެވެ. އެއާއެކު ސައްތާރު ތިންވަނަ ދައުރަކަށް ހޮވިވަޑައިގަތީ 48 ވޯޓާއެކުގައެވެ. ރައީސްގެ މަގާމަށް އޭނާ އެކަނި ކުރިމަތިލެއްވުމުން، ނަގާފައިވަނީ ފެންނަ ނުފެންނަ ވޯޓެކެވެ.
މި ފަހަރުގެ އިންތިޚާބުގައި ނައިބު ރައީސްގެ މަގާމަށް ކުރިމަތިލެއްވީ މިހާރުވެސް އެ މަގާމު ފުރުއްވަމުން އަންނަ އިސްމާޢީލް ޢަލީއެވެ. ފަރުދީ މެންބަރުން ތަމްސީލުކުރާ އަންހެން މެންބަރަކަށް ރަހީމާ އާދަމް ކުރިމަތިލެއްވިއިރު، ފަރުދީ މެންބަރުން ތަމްސީލުކުރާ ފިރިހެން މެންބަރަކަށް ނަން ހުށަހެޅުއްވީ މުޙައްމަދު ނައްވާރު އިބްރާހީމެވެ. އަދި ޓެކްނިކަލް އޮފިޝަލުން ތަމްސީލުކުރާ މެންބަރުކަމަށް ކުރިމަތިލެއްވީ ހަސަން ސިރާރެވެ. މީގެ އިތުރުން ކޯޗުން ތަމްސީލުކުރާ މެންބަރަކަށް އަޙްމަދު ފިރާސް އަފީފް ކުރިމަތިލެއްވިއިރު، ހަޒާންދާރުގެ މަގާމަށް ކުރިމަތިލައްވާފައިވަނީ އަލީ ޝަމީމެވެ.
ސްވިމިން އެސޯސިއޭޝަންގެ އިންތިހާބުގައި ކުލަބުތައް ތަމްސީލުކުރާ މަގާމަށް ވާދަކުރުމަށް އެއްވެސް ބޭފުޅަކު ފޯމު ހުށަހަޅުއްވާފައެއް ނުވެއެވެ. އެއާއެކު ސްވިމިން އެސޯސިއޭޝަންގެ އިލެކްޓޯރަލް ކޯޑުގެ ދެވަނަ މާއްދާގެ (ބ) ގައި ބަޔާންކޮށްފައިވާ ގޮތުގެ މަތިން، ފޯމު ހުށަހެޅުމުގެ ދެވަނަ ފުރުސަތު، މާދަމާއިން ފެށިގެން ހުޅުވާލާނެއެވެ. އަދި އެ ފުރުސަތުގެ ސުންގަޑި ހަމަވާނީ މި މަހުގެ 16 ވަނަ ދުވަހެވެ.