ދިޔަވަރު ބޮޑުވާ ވަގުތު، ރާއްޖޭގެ ބައެއް ސަރަޙައްދުތަކަށް އުދައިގެ އަސަރު ކުރާނެ ކަމަށް ލަފާ ކުރެވޭތީ އެކަމަށް ތައްޔާރުވެތިބުމަށް މޫސުމާއި ބެހޭ ޤައުމީ އިދާރާއިން އިލްތިމާސް ކުރައްވައިފިއެވެ.
ޕީ.އެސް.އެމް ނިއުސްއަށް މަޢުލޫމާތު ދެއްވަމުން، މޫސުމާ ބެހޭ ޤައުމީ އިދާރާގެ މީޓްރޮލޮޖީ ޑިރެކްޓަރ އަހުމަދު ރަޝީދު ވިދާޅުވީ، އުދަ އަރާނެ ކަމަށް ލަފާ ކުރެވެނީ ކޮންމެ ދުވަހެއްގެ ދިޔަވަރު ބޮޑުވާ ވަގުތުކަމަށްވާ މެންދުރު 12 އާއި، ދަންވަރު 12 އާ ދެމެދުގައިކަމަށެވެ. އެގަޑިއަކީ މި ދުވަސްވަރު އެންމެ ބޮޑަށް ދިޔަވަރު ބޮޑުވާ ގަޑިތައް ކަމަށްވެސް އެ އިދާރާއިން ވިދާޅުވެއެވެ.
އަހުމަދު ރަޝީދު ވިދާޅުވީ، މިގޮތަށް ދިޔަވަރު ހުންނާނެ ކަމަށް ލަފާ ކުރެވެނީ މިއަދުން ފެށިގެން ކުރިއަށް އޮތް 3 ދުވަހަށް ކަމަށެވެ. މާލެއަށް އުދައިގެ އަސަރު ކުރާނެ ކަމަށް އެންމެ ބޮޑަށް ލަފާ ކުރެވޭނީ މާލޭ އިރުމަތީ ފަރާތުން ކަމަށްވެސް މޫސުމާ ބެހޭ ޤައުމީ އިދާރާއިން ވިދާޅުވެއެވެ. އަދި ރާއްޖޭގެ ބިންތިރި، އާންމުކޮށް އުދަ އަރާ ރަށްތަކަށްވެސް އުދައިގެ އަސަރު ކުރުންވެސް އެކަށީގެންވާ ކަމަށާއި، އެކަމަށް އާންމު ރައްޔިތުން ސަމާލުވެ ތިބުމަށް މޫސުމާއި ބެހޭ ގައުމީ އިދާރާއިން ވިދާޅުވެއެވެ.